УИХ-ын Эдийн засгийн байнгын хорооны өнөөдөр /2024.12.24/-ийн хуралдаанаар дөрвөн асуудлыг хэлэлцлээ.
Хуралдааны эхэнд “Улаанбаатар хотын Дулааны гуравдугаар цахилгаан станцын өргөтгөл, шинэчлэлийн зураг төсөл боловсруулах тухай Монгол Улсын Засгийн газар, Оросын Холбооны Улсын Засгийн газар хоорондын хэлэлцээр”-ийг соёрхон батлах хуулийн төслийг хэлэлцэж дэмжлээ.
56 дахь жилдээ үйл ажиллагаа явуулж байгаа “Дулааны гуравдугаар цахилгаан станц” ТӨХК нь хотын дулаан хангамжийн хэрэглээний 32 хувийг, Төвийн бүсийн цахилгаан эрчим хүчний 16 хувийг хангаж ажилладаг. Насжилт өндөртэй уг станцын хувьд техникийн гэмтэл саатлаас шалтгаалан хэрэглэгчдийг дулааны эрчим хүчээр хязгаарлах эрсдэлтэй нөхцөлд байна. Энэхүү эрсдэлийг бууруулахын тулд станцыг ойрын хугацаанд өргөтгөн шинэчлэх шаардлагатай юм.
Улаанбаатар хотын одоогийн өсөн нэмэгдэж буй эрчим хүчний хэрэглээг найдвартай хангах зорилгоор Дулааны гуравдугаар цахилгаан станцыг хоёр үе шаттай өргөтгөн, шинэчлэхээр төлөвлөсөн бөгөөд эхний үе шатанд 50 МВт-ын дулааны станц, дараагийн шатанд ашиглалтын хугацаа дууссан 48 МВт-ын станцыг буулган, суурин дээр нь 250 МВт-ын дулааны цахилгаан станцыг шинээр барина гэж Эрчим хүчний сайд Б.Чойжилсүрэн танилцууллаа.
Дараа нь Улсын Их Хурлын даргын 2024 оны 83 дугаар захирамжаар байгуулагдсан ажлын хэсгийн санал, дүгнэлттэй танилцлаа. УИХ-ын гишүүн Х.Ганхуягийн ахалж ажилласан уг ажлын хэсгийн санал, дүгнэлтийн дагуу Зөвшөөрлийн тухай хуулийн хэрэгжилтийг эрчимжүүлэх хүрээнд Засгийн газарт чиглэл өгөх тухай байнгын хорооны тогтоол батлав.
