Нийслэлийн ИТХ-ын ээлжит бус XXI хуралдаан өнөөдөр цахимаар болж Монгол Улсын Их Хурлын ээлжит сонгуулийн дүнгээр Улсын Их Хурлын гишүүнээр сонгогдсон Нийслэлийн иргэдийн Төлөөлөгчдийн Хурлын Төлөөлөгчдийг чөлөөлөх тухай асуудлыг хэлэлцлээ.
Монгол Улсын Их Хурлын ээлжит сонгууль 2024.06.28-ны өдөр болж, Сонгуулийн ерөнхий хороо 2024.06.30-нд Улсын Их Хурлын гишүүнээр сонгогдсон тухай 191 дүгээр тогтоолыг баталсан. Сонгуулийн дүнгээр Нийслэлийн ИТХ-ын доорх төлөөлөгчид Улсын Их Хурлын гишүүнээр сонгогдсон юм. Үүнд:
-Жуковын Алдаржавхлан МАН
-Наранцэцэгийн Алтаншагай МАН
-Нацагдоржийн Батсүмбэрэл МАН
-Хөххүүгийн Болормаа АН
-Пүрэвжавын Ганзориг ХҮН
-Пүрэвсүрэнгийн Наранбаяр ХҮН
-Даваахүүгийн Пүрэвдаваа ҮЭ
-Доржзовдын Энхтуяа АН
Монгол Улсын Үндсэн хуульд Улсын Их Хурлын гишүүн нь Ерөнхий сайд, Засгийн газрын гишүүнээс бусад хуулиар тогтоогдсон үүрэгт үл хамаарах ажил, албан тушаал хавсарч болохгүй гэж заасан байдаг. Мөн Улсын Их Хурлын тухай хуульд УИХ-ын гишүүнээр сонгогдохоос өмнө эрхэлж байсан ажил, албан тушаалаас Улсын Их Хурлын гишүүний тангараг өргөхөөс өмнө чөлөөлөгдсөн шийдвэр гаргуулсан байх заалттай. Тиймээс Нийслэлийн ИТХ өнөөдөр ээлжит бусаар хуралдаж,Улсын Их Хурлын гишүүнээр сонгогдсон төлөөлөгчдийг хүсэлтийнх нь дагуу НИТХ-ын төлөөлөгчөөс чөлөөллөө.
МАН-ын 3, АН-ын 2, ХҮН-ын 2, Үндэсний эвслийн 1 гишүүн ийнхүү НИТХ-ын төлөөлөгчөөс чөлөөлөгдлөө.
