Дэлхийн аварга болсон Б.Баасанхүүг “Имперо” групп хоёр өрөө байраар мялаав

gereg.mn 2024-05-20

АНЭУ-ын Абу Даби хотод жүдо бөхийн насанд хүрэгчдийн дэлхийн аварга шалгаруулах тэмцээн тавдугаар сарын 19-24-нд болж байна. Олимпын эрхийн оноо олгох тус тэмцээнд 104 орны нийт 633 (эрэгтэй 326, эмэгтэй 307) тамирчин өрсөлдөх бол манай улсаас 18 тамирчин өрсөлдөж байна.Тэмцээний эмэгтэйчүүдийн 48 кг-ын жинд Б.Баасанхүү хагас шигшээд Казахстаны бөхийг цэвэр ялсанаар мөнгөн медалийн болзол хангасан. Б.Баасанүү Италийн бөх Ассунта Скуттотой барилдан ялалт байгуулж, алтан медалийн эзэн боллоо.

Б.Баасанхүүгийн энэ амжилтыг мялааж М.Энхтайванбаатар захиралтай “Имперо” групп хоёр өрөө байраар шагнажээ.

Хөвсгөл аймгийн уугуул Б.Баасанхүү Дэлхийн аварга болохоосоо сарын өмнө улсын аваргад түрүүлснээс гадна Ази тивийн аварга болж, төрийн дууллаа эгшиглүүлсэн. Мөн Tажикистан Душанбе хотод болсон олимпын эрхийн оноо олгох Их дуулга тэмцээнд түрүүлсэн юм. Ирэх долоон сард болох Парисын олимп түүнийг хүлээж байна.