Монгол Улсын Шадар сайд Н.Номтойбаяр Үндэсний их баяр наадмын бэлтгэл ажилтай биечлэн танилцаж, зохион байгуулалтын явцад хяналт тавин ажиллаж байна. Энэ жилийн баяр наадмыг иргэд, наадамчин олон болон гадаадын жуулчдад илүү хүртээмжтэй, нээлттэй хүргэх үүднээс хэд хэдэн томоохон ажлыг зохион байгуулахаар бэлтгэжээ.
Юун түрүүнд баяр наадмын нээлт, хаалтын ажиллагаанаас гадна олны хүлээдэг “Дээлтэй монгол”, “Улаанбаатарын үдэш” зэрэг гол арга хэмжээнүүдийг төв талбайн том LED дэлгэц болон “Youtube” сувгаар орон даяар шууд дамжуулах аж.
Мөн наадмын уур амьсгалыг хөдөө орон нутаг, дүүрэг бүрт хүргэх зорилгоор 21 аймаг, 9 дүүргийн төв талбайн LED дэлгэцээр нээлт, хаалтын үйл ажиллагааг шууд толилуулахаар бэлтгэл хангажээ.
Үүнээс гадна наадмын нээлтийн тоглолтын тасалбар худалдан авч амжаагүй гадаадын жуулчдад зориулж маргааш буюу 2026 оны 7 дугаар сарын 7-ны 13:00 цагаас наадмын нээлтийн өмнөтгөл тоглолтыг үнэ төлбөргүй үзүүлэхээр шийдвэрлэсэн байна. Монгол наадмыг дэлхийд сурталчлах ажлын хүрээнд “Youtube” сувгийн шууд дамжуулалтыг Орос, Хятад, Солонгос хэлний орчуулгатайгаар хүргэх юм.
Түүнчлэн баяр наадмыг олон нийтэд хүртээмжтэй байлгах зарчмын дагуу хөгжлийн бэрхшээлтэй иргэдэд зориулж “Төв цэнгэлдэх хүрээлэн” болон “Сүхбаатарын талбай”-д тусгай хэсэг гаргахаар болжээ. Эдгээр байршлуудад хийгдэх шууд дамжуулалтыг дохионы хэлмэрчтэйгээр үзүүлж, иргэдийн наадах эрхийг бүрэн хангахаар бэлтгээд байна
