УИХ-ын гишүүн Л.Оюун-Эрдэнэ, ЗГХЭГ-ын дарга Б.Энхбаяр нарын хооронд өнгөрсөн жил үүссэн авлига авсан, эсэх тухай маргаан өчигдрөөс дахин хүчээ авч сошиалаар дүүрэн юм болж байна. Л.Оюун-Эрдэнэ болохоор “миний хөрөнгө орлого нотлогдсон юу ч байхгүй байгаа биз дээ гэх”. Харин Б.Энхбаяр болохоор үгүй “Х.Баттулга хамтарч Маш нууц гэрээ байгуулан “Бодь”-д төмөр зам барих ажлыг өгсөн” гээд баримт гарган тавилаа.
Уг нь манайх хуультай, хуулийн байгууллагуудтай орон гэтэл “Бодь”-той холбоотой энэхүү 110 сая ам.долларын хэрэг шалгагдаж байгаа юу, хэзээ шийдэгдэх вэ гээд асуулт тун их.
Өнөөдөр өглөө Л.Оюун-Эрдэнэ доорх постыг бичсэн.
“Манай могой Б.Энхбаяр “Бодь-110” гэхээр л хачин их цочдог хүн дээ!
Гэмт хүн гэлбэлзэнэ гэдэг шиг мань хүн энэ сэдвээс их эмээнэ. Арга ч үгүй л дээ. Материалыг нь судалж ойлгочихоод, Бодийг-Бортээг болгож хувиргаад шагналд нь сая доллар авчихсан хүн.
Сая мэдэгдэл хийхдээ Бодийн 110 сая доллар валютаар биш, 286 тэрбум төгрөгөөр шилжсэн гэв. Одоо бүр сандарвал манай богино могой гэрээг нь хийхдээ ингэж бодоогүй гэх нь л дээ.
Мөнгө мөртэй, эрх мэдэл хязгаартай шүү, Б.Энхбаяр аа!
Одоохондоо энэ сэдвийг хуулийнхан дээр хүчээр барьж байгаа ч, 110 сая ам.доллар төмөр замд зарцуулагдаагүй баримт устахгүй ээ! Орлуулж болохгүй!
Худал хурдан ч үнэнд гүйцэгдэнэ…!
АТГ-т өгсөн материалыг тоолж, бас өргөж үзмээр байвал Н.Номтойбаяр Шадар сайдынхаа ширээний нүдэнд 6 сар дарагдсан түр хороо байгуулах тогтоол дээр гарын үсэг зураад Улсын Их Хуралд оруулчих!
Парламент дээр гэрчүүдээ дуудаад, бичлэгээ ч нээлттэй сонсоод, олон нийтийн өмнө ярилцацгаая!
Н.Номтойбаяр миний хөгшин ч одоо наад сонсголоо хий, эсвэл боль!
УИХ-ын гишүүд бланк олж зурахгүй байна гэдэг нэг л ядмаг, чамд зохихгүй тайлбар болсон. Сайд болчихсон чинь хүнд байна гээд үнэнээ хэлчих ээ.
Б.Энхбаяр аа, учиргүй үнэнч хүн болж жүжиглээд бас хэрэггүй! Солигддог тоглоом шиг хуурмаг дүр чинь аль эрт илчлэгдсэн! Нэг нүүрний дор хоёр амьдралаар амьдраад хэрэггүй!
Хаана байна вэ, тэр Оюу толгойн 20 сая? Хаана байна вэ, нөгөө хил дээр зарсан газрууд?
Хаана байна вэ, хүн алаад чандарласан асуудал?
Бодийг хаацайлж мөнгө олж, албан тушаал ахисан шиг, 14 давхарын дээрэм гэж байгаад Эрдэнэтийн 6 сая долларын авилгын асуудлыг хааж, ял наймаалцаж, дундаас нь мөнгө хуссан асуудал чинь ч бас удахгүй тодорхой болно.
Хаяг дээрээ байхгүй гэж зугтахгүйгээр нэхэмжлэлээ аваарай. Шүүх дээр уулзацгаая!
Олонх болчихоод цөөнхтэй хамтарлаа, Б.Чимид багшийн Үндсэн хуулийн зарчмыг зөрчлөө гэсээр байгаад хамтарсан Засгийн газрыг унагаасан. Одоо улс орноо хар, эдийн засгаа хар!
Ялсан, 35 хувийн рейтингтэй намыг бүрэн эрхийн хугацаатай нь хүлээлгэж өгсөн. Өнөөдөр хэдэн хувь болж буурсан байгааг эрхэм ХЭГ-ын сайд та мэдэх үү?
“Зөв хүн – Электорат” хөдөлгөөн улс төрийн даалгавраа биелүүлж, энэ намыг хагалж дуусгаж байх шиг байна. Одоо хангалттай биш үү?
ХЭГ-ын сайдыг би ч хийж байсан. ЕС-аа дэмжиж, улсын ажлыг урагшлуулдаг алба болохоос хов зөөж, хоолойг нь боодог алба биш шүү!
Өнөөдөр харамсалтай нь чи биш, ЕС Учрал чиний өмнөөс ХЭГ-ын ажлыг хийж байна” гэв.
Хариуд нь Б.Энхбаяр “Тагнуулын байгууллагын дүгнэлт, Засгийн газрын шийдвэрээр энэ намар ил болсон. Үндэсний аюулгүй байдлын зөвлөл шийдвэрлэсэн 2021 оны 06-р сарын 23-ны өдөр бол шинэ Ерөнхийлөгч сонгогдоод тангаргаа өргөж бүрэн эрхээ хэрэгжүүлж эхлэхээс хоёр хоногийн өмнө амжиж Х.Баттулга, Л.Оюун-Эрдэнэ хоёрын “чоно борооноор” хийсэн ажил. Төмөр замыг төрийн нууцад авч, нүүрс урьдчилан борлуулах (офтейк) замаар Бодь интернейшнлтэй шууд гэрээ байгуулсан. Гэрээний дүнг нь хар. Л.Оюун-Эрдэнэ дандаа өөрийнхөө хулгайг гөлөг төөрүүлэх гэж өөр бусад руу иш үндэсгүй нялзааж худал ярьдаг сэтгэцийн асуудалтай хүн” гээд доорх баримтыг гаргаж тавиад байна.
