Саяхан АНУ-ын шүүхээс Жеффри Эпштин (Jeffrey Epstein)-ий баримтууд хэмээх хэрэгт холбогдох нууц баримтуудыг ил болгосон нь дэлхий нийтэд дахин шуугиан тариад байна.
Уг хэрэг бол орчин үеийн түүхэн дэх хамгийн том дуулиануудын нэг юм.
ЖЕФФРИ ЭПШТИН ГЭЖ ХЭН БЭ?
Тэрээр Америкийн тэрбумтан, санхүүгийн зуучлагч байсан бөгөөд 2019 онд насанд хүрээгүй хүүхдүүдийг бэлгийн мөлжлөгт ашигласан, хүн худалдаалах гэмт хэрэг үйлдсэн хэргээр баривчлагдсан юм. Тэрээр шүүх хурал болохоос өмнө шоронд амиа хорлосон байдалтай олджээ. Гэхдээ түүнийг амиа хорлосон эсэхэд эргэлздэг.
“ЭПШТИНИЙ ФАЙЛУУД” ГЭЖ ЮУ ВЭ?
Энэ нь Эпштиний хамсаатан байсан Гислейн Максвеллтэй холбоотой иргэний хэргийн хүрээнд цугларсан шүүхийн баримтууд юм. Эдгээр баримтуудад:
- Эпштиний хувийн арал (Little St. James) болон эдлэн газруудад зочилж байсан алдартнууд
- Түүний хувийн онгоцоор (“Lolita Express” гэж нэрлэгддэг) ниссэн хүмүүсийн нэрс
- Хохирогчдын мэдүүлэг болон гэрчүүдийн яриа багтжээ.
Яагаад ийм их шуугиан болоод байна вэ?
Хамгийн гол шалтгаан нь эдгээр файлууд дотор дэлхийн нөлөө бүхий эрхмүүдийн нэрс дурдагдсанд байгаа юм. Үүнд:
- Улс төрчид: Билл Клинтон, Дональд Трамп зэрэг ерөнхийлөгч асан хүмүүс.
- Язгууртнууд: Британийн ханхүү Эндрю (тэрээр энэ хэргээс болж хааны гэр бүлийн үүрэгт ажлаа өгсөн).
- Одод ба эрдэмтэд: Стивен Хокинг, Дэвид Копперфильд, Майкл Жексон зэрэг хүмүүсийн нэрс янз бүрийн байдлаар дурдагдсан.
Гэхдээ нэр нь дурдагдсан хүн болгон гэмт хэрэгтэн гэсэн үг биш. Зарим нь зүгээр л зочин байсан бол, зарим нь Эпштинийг гэмт хэрэгтэн гэдгийг мэдээгүй байсан гэж мэдүүлдэг. Гэхдээ энэ нь “элитүүдийн дундах нууц сүлжээ”-г илчилсэн учраас дэлхий нийтийг шуугиулж байна.
Хэргийн гол асуудал нь зөвхөн бэлгийн хүчирхийллийн тухай биш, харин эрх мэдэлтэй, баян хүмүүс хуулиас дээгүүр загнаж, системээрээ нэгнийхээ бузар үйлдлийг нуун дарагдуулж байсанд оршиж байгаа юм.
ОНЦЛОХ НЭРС
Шүүхийн баримтуудад 150 гаруй хүний нэр дурдагдсанаас дараах хүмүүс хамгийн их анхаарал татаж байна:
- Ханхүү Эндрю: Тэрээр Эпштиний хэрэгт хамгийн гүнзгий холбогдсон хүмүүсийн нэг. Хохирогч Виржиниа Жуффре түүнийг насанд хүрээгүй байхад нь бэлгийн харилцаанд орсон гэж буруутгасан. Ханхүү үүнийг үгүйсгэсэн ч шүүхээс гадуур асар их хэмжээний мөнгө төлж тохиролцсон байдаг.
- Билл Клинтон: Файлуудад түүний нэр “Doe 36” гэж тэмдэглэгдсэн байх магадлалтай бөгөөд 50 гаруй удаа дурдагддаг. Тэрээр Эпштиний онгоцоор олон удаа ниссэн нь тодорхой болсон ч, Клинтоны талаас “би түүний аймшигт хэргийн талаар мэдээгүй байсан” гэж мэдэгддэг.
- Стивен Хокинг: Алдарт физикч Эпштиний арал дээр зочилж байсан зураг ил болсон нь хүмүүсийг ихэд гайхшруулсан. Гэхдээ түүнийг ямар нэгэн хууль бус үйлдэлд шууд буруутгасан баримт одоогоор гараагүй байна.
- Дональд Трамп: Тэрээр Эпштинийг Флоридад байхдаа мэддэг байсан бөгөөд файлуудад түүний нэр дурдагддаг. Гэхдээ хохирогчдын мэдүүлгээр Трамп Эпштиний арал руу яваагүй, мөн түүний гэрүүдэд бэлгийн харилцаанд орж байгаагүй гэж тэмдэглэгджээ.
ХОХИРОГЧДЫН МЭДҮҮЛЭГТ ДУРДАГДСАН СҮЛЖЭЭ
Хохирогчдын мэдүүлгээс үзэхэд Эпштин зөвхөн өөрөө хүчирхийлэл үйлдэх бус, харин “нөлөө бүхий найзууддаа” үйлчлэх томоохон сүлжээ байгуулсан байжээ.
- “Ажилд зуучлах” арга: Эпштин болон түүний туслах Гислейн Максвелл нар залуу охидод “ирээдүйн карьер, сургалтын төлбөр, массаж хийх ажил” амлаж өөртөө татдаг байсан.
- Арал дээрх хяналт: Эпштиний “Little St. James” арал нь бүхэлдээ хяналтын камертай байсан бөгөөд зарим шинжээчид түүнийг ирсэн зочдоо (улс төрчид, баячууд) бичлэгээр барьцаалж, өөрийн эрх ашгийн төлөө ашигладаг байсан байж болзошгүй гэж үздэг.
ХЭРЭГ ХЭРХЭН ЭХЭЛСЭН БА ҮРГЭЛЖИЛЖ БАЙГАА ВЭ?
2024 оны эхээр ил болсон баримтуудад Виржиниа Жуффре болон бусад хохирогчид Эпштинийг зөвхөн Америк бус, олон улсын томоохон улс төрчидтэй холбоотой байсныг гэрчилсэн юм. Энэ нь энэ хэргийг зөвхөн нэг гаж донтноос илүүтэй “дэлхийн дээд давхаргынхны нууц гэмт бүлэглэл” мэт харагдуулж байгаа юм.
Одоогоор Эпштин өөрөө нас барсан, түүний хамсаатан Гислейн Максвелл 20 жилийн ял авсан. Харин файлуудад дурдагдсан зочид ихэвчлэн “Би тэнд байсан ч юу болж байгааг мэдээгүй”, “Би Эпштинээс санхүүгийн зөвлөгөө л авдаг байсан” гэх мэтээр өөрсдийгөө хамгаалдаг. Шүүхийн процесс удаан, баримтууд нь ихэвчлэн иргэний хэргийн хүрээнд байгаа тул шууд эрүүгийн хариуцлага хүлээлгэхэд хүндрэлтэй байгаа ажээ.
Энэхүү аймшигт хэрэг анх 2005 онд Флорида мужийн Палм-Бич хотод нэгэн ээж 14 настай охиноо Эпштиний харшид бэлгийн хүчирхийлэлд өртсөн гэж цагдаад мэдээлснээр эхэлжээ.Цагдаа нар Эпштинийг насанд хүрээгүй олон охиныг мөнгөөр уруу татаж, хүчирхийлдэг байсныг тогтоосон.
2008 онд тэрээр холбооны хүнд ялаас мултарч, ердөө 13 сарын ял авсан “Sweetheart deal” буюу нууц хэлцэл хийж чадсан. Энэ нь түүнийг асар их нөлөөтэйг баталсан юм.
Гэвч 2018 онд Miami Herald сонины сэтгүүлч Жюли К.Брауны эрэн сурвалжлах цуврал нийтлэл гарснаар хэрэг дахин сэргэж, 2019 оны 7-р сард Эпштин Нью-Жерсид баривчлагдаж, хүн худалдаалах хэргээр буруутгагдсан.
Гэтэл тэрээр шоронд шүүх хурлаа хүлээж байхдаа буюу 2019 оны 8-р сарын 10-нд нас барсан. Албан ёсны дүгнэлтээр “амиа хорлосон” гэсэн ч, хяналтын камерууд ажиллаагүй, хамгаалагчид унтаж байсан зэрэг нь “түүнийг амыг нь барихын тулд хөнөөсөн” гэх таамгийг дэлхий нийтэд төрүүлсэн.
2024 оны эхээр АНУ-ын шүүхээс Эпштиний хамсаатан Гислейн Максвеллтэй холбоотой иргэний хэргийн нууц баримтуудыг ил болгож эхэлсэн.
Баримтуудад Билл Клинтон, Дональд Трамп, Стивен Хокинг, Британийн ханхүү Эндрю зэрэг 150 гаруй хүний нэр дурдагдсан.
Хамгийн сүүлийн үеийн мэдээллээр, Эпштин нас барахаасаа 12 хоногийн өмнө прокуроруудтай хамтарч ажиллах, өөрөөр хэлбэл бусад нөлөө бүхий хүмүүсийг илчлэх талаар хэлэлцэж байсан нь ил болсон. Энэ нь түүний үхлийг улам сэжигтэй болгож байна.
2026 оны эхээр АНУ-ын Хууль зүйн яамнаас Эпштин болон түүний сүлжээний талаарх нэмэлт 3 сая орчим хуудас материалыг нийтэд дэлгэсэн нь өнөөдрийн дуулианы гол цөм болоод байна.
Саяхан ил болсон баримтууд нь “Хэн гэмт хэргийг нуун дарагдуулсан бэ?”, “Хэн энэ хэрэгт оролцсон бэ?” гэдэг асуултуудыг тавьсаар байгаа юм.
НЭМЭЛТ ТАЙЛБАР:
“Лолита Экспресс” :Эпштиний эзэмшиж байсан Boeing 727 загварын хувийн нисэх онгоцонд хэвлийнхэн “Лолита Экспресс” (Lolita Express) гэж нэр өгчээ. Владимир Набоковын насанд хүрээгүй охинд дурласан эрийн тухай өгүүлдэг Лолита зохиолоос сэдэвлэж хэвлэлүүд ийнхүү нэрлэсэн байна.
Энэ онгоцоор дэлхийн нөлөө бүхий эрхмүүд (Билл Клинтон, Ханхүү Эндрю гэх мэт) Эпштиний хувийн арал руу болон олон улсын хотууд руу нисдэг байсан бөгөөд нислэгийн тэмдэглэл нь одоо энэ хэргийн хамгийн чухал нотлох баримт болдог. Учир нь хэн, хэзээ, хаашаа Эпштинтой хамт ниссэн, онгоц дотор насанд хүрээгүй охид байсан эсэхийг энэ тэмдэглэлээр баталдаг. Зарим хохирогчид онгоц дотор хүчирхийлэлд өртдөг байснаа мэдүүлжээ.
“Эпштиний арал”:Америкийн Виржини арлуудад байрлах, Эпштиний хувийн эзэмшлийн жижиг арал. Хэвлэлүүд үүнийг “Нүглийн арал” эсвэл “Хүчирхийллийн арал” гэж нэрлэх нь бий.
Далайн голд байрлах энэ арал нь гаднын хүн нэвтрэх боломжгүй, маш өндөр хамгаалалттай тул Эпштин тэнд өөрийн “хуульгүй ертөнц”-ийг байгуулсан.
Арал дээрх хамгийн их анхаарал татдаг зүйл нь цэнхэр судалтай, алтан бөмбөгөр оройтой “Сүм” мэт харагдах байгууламж юм. Хүмүүс үүнийг доороо нууц хонгилтой, хүүхэд хүчирхийлэх зориулалттай өрөөнүүдтэй байсан гэж таамагладаг ч албан ёсны мөрдөн байцаалтаар хөгжмийн өрөө эсвэл спорт заал байсан гэх мэдээлэл гарч байв. Энэ арал дээр очсон зочдын нэрс ил болох нь улс төрчдийн хувьд хамгийн аюултай зүйл. Учир нь тийшээ очихын тулд зөвхөн Эпштиний хувийн онгоц эсвэл завийг ашиглах ёстой бөгөөд “тэнд юу болдгийг мэдээгүй” гэж хэлэхэд хэцүү байдаг.
“Лолита Экспресс” болон “Little St. James” арал нь зөвхөн баян хүний тансаглал биш, харин дэлхийн хүчирхэг эрхмүүдийг хууль хяналтаас гадуур “барьцаалах”, тэднийг гэмт хэрэгтээ татан оролцуулах замаар Эпштин өөрийн нөлөөгөө тогтоодог байсан гол механизм нь байжээ.
Эх сурвалж: The Guardian, BBC News
