Америкийн Монгол Судлалын Төвийн цуврал лекц ярилцлагын 2025 оны 4 дүгээр сарын зочин илтгэгч: ШУТИС-ийн Нийгэм Хүмүүнлэгийн сургуулийн ахлах багш, доктор, дэд профессор Доржпүрэвийн Хатанбаатар Монголын археологийн сүүлийн үеийн сонирхолтой сэдвийн нэг болох “Түрүүлгэ нь харуулсан оршуулгат булш”, тэр дундаа “Улаан зуух” хэлбэрийн булшны судалгааны талаар илтгэл хэлэлцүүлжээ.
Доктор Д.Хатанбаатар 2002-2006 онд МУИС-ийн НШУС-ийн Археологи-Антропологийн ангийг археологич, түүхийн багш мэргэжлээр төгссөн. 2006-2008 онд мөн сургуулийн Археологи-Антропологийн тэнхимд “Тамирын Улаан Хошууны Хүннү булшны харьцуулсан судалгаа” сэдвээр магистр, 2019 онд “Монголын Хүрлийн үеийн Түрүүлгэ нь харуулсан оршуулгат булшны судалгаа” сэдвээр археологийн ухааны докторын зэрэг тус тус хамгаалжээ.
2007 оноос ШУТИС-ийн Хүмүүнлэгийн салбарт ахлах багшаар ажиллаж, 2024 онд ШУТИС-ийн дэд профессор цол хүртсэн. Мөн БНТУ-ийн Гази их сургуульд “Монголын археологийн шинэ үеийн судалгаа”, БНСУ-ын Конжугийн Их Сургуульд “Ямаан усанд хийгдсэн археологийн судалгаа”сэдвээр лекц уншиж байв. Нэгэн сэдэвт бүтээл 1, хамтын бүтээл. 5, эрдэм шинжилгээний өгүүлэл, илтгэл 50 гаруйг хэвлүүлсний дотор Asian Archaeology, Asian Research Network, Journal of Archaeological science, The Cell, Archaeology Method and Theory зэрэг томоохон сэтгүүлүүдэд хэвлэгдсэн өгүүллүүд багтаж байна. Судалгааны үндсэн чиглэл нь эртний нүүдэлчдийн булш оршуулгын судалгаа, хадны зураг, хүрэл зэвсгийн археологийн соёлыг хамардаг.
