Хууль зүйн сайд О.Алтангэрэл “Ноорог медиа”-г шалгахдаа Цагдаагийн байгууллага хууль зөрчөөгүй, хэрэв зөрчсөн бол хариуцлага хүлээнэ гэлээ.
Мөн “Ноорог медиа”-тай холбоотой нэр бүхий хүмүүсийг 2024 оны зургаа, есдүгээр сараас эхлэн Эрүүгийн хуулийн тусгай зүйл ангиудаар шалгагдаж ирсэн гэв. Гэнэт нэг цагдаа гарч ирээд ярьсан зүйл биш. “Хэрвээ цагдаагийн байгууллагын өгсөн мэдээлэл дунд буруу ташаа мэдээлэл байвал Эрүүгийн хуульд заасан гэмт хэрэг болно. Эрүүгийн хэрэг хянан шийдвэрлэх ажиллагаа бол бүх процесс нь хуульд заасан журмын дагуу явагддаг. Энд нэг л хазгай гишгэвэл хууль зөрчдөг. Энэ ажиллагааг хийсэн хүн нь эрүүгийн хариуцлагад татагддаг. Тэгэхээр цагдаагийн байгууллагаас өгсөн мэдээлэл бол ардаа хариуцлагатай гэдгийг мэдэгдье” гэлээ.
Цагдаагийн байгууллагаас тэднийг баривчлахаар зөвшөөрөл хүссэн ч прокуророос ямар ч зөвшөөрөл олгоогүй, тийм учраас албан ёсны баривчилгаа хийгдээгүй гэнэ. Харин компьютер техник хэрэгсэлд үзлэг хийж, бэхжүүлж, баримтжуулсан үйл ажиллагааг явуулжээ.
Гэхдээ ингэх явцад “Хэвлэн нийтлэх эрх чөлөөнд ямар нэг байдлаар хандсан байна уу, хэвлэн нийтлэх контенттой холбоотой байна уу” гэдэгт анхаарч ажиллаж буйгаа Хууль зүйн сайд хэлэв.
Цагдаагийн байгууллагаас сайддаа өгсөн мэдээллээр, цахим мөрийтэй тоглоомын 9.3 тэрбум төгрөгийн гүйлгээ “Ноорог медиа”-д хамааралтай этгээдийн зургаан дансаар хийгджээ. Улмаар бусдыг амиа хорлоход хүргэх зүйл ангиар шалгагдаж байгаа гэв.
Тэрээр нягталсны эцэст мэдээлэл өгч буй гэдгээ ч хэллээ.
