Үндэсний Цэцэрлэгт хүрээлэнд БОАЖ-ын сайд Б.Бат-Эрдэнэ, УИХ-ын гишүүн Б.Саранчимэг болон нийслэлийн холбогдох албан тушаалтнууд очиж ажиллав.
Анхны батлагдсан зураг төсөл, ерөнхий төлөвлөгөө алдагдсан, одоо хэрэгжүүлж байгаа KFC Land байгуулах ажил нь зураг төслөө батлуулалгүйгээр өмнө нь тохижуулсан ногоон байгууламжийг эвдэж, холбогдох зөвшөөрөлгүйгээр газар шорооны ажлаа эхлүүлсэн байдалтай байна.
Хэдийгээр 40 ширхэг ТҮЦ байрлуулсан гэж ажил хариуцсан албан тушаалтан хэлсэн ч иргэдээс ирүүлсэн гомдол бодитой буюу одоогоор 2 дахин их 81 ширхэг ТҮЦ-ийг хүрээлэнгийн дотор байрлуулж, цэцэрлэгт хүрээлэнгийн үндсэн өнгө төрх, төлөвлөлт хэдийнээ алдагджээ.
Үндэсний Цэцэрлэгт Хүрээлэн бол нийслэл Улаанбаатар хотын “ногоон зүрх” болсон, иргэдийн очиж алхах, амрах, салхилах, эрүүл мэнддээ анхаарч дасгал хөдөлгөөн хийх зориулалттай 973 га газрын 85% нь зөвхөн мод, бут, зүлэгжүүлэхээр төлөвлөлт хийгдсэн цэцэрлэгт хүрээлэн юм.
Төсөл хэрэгжүүлж байгаа болон ажил хариуцсан албан тушаалтнуудад анхны ерөнхий төлөвлөгөөг алдагдуулахгүй, ногоон байгууламж сүйтгэхгүй, иргэд олон нийтээс тавьж байгаа шаардлагад нийцүүлж ажиллахыг анхааруулав.
