Ц.Даваасүрэн: Цэвэрлэх байгууламжийн төслийн удирдагчаар мэргэжлийн бус сувилагч мэргэжилтэй хүн тавьсан

УИХ-ын хаврын ээлжит чуулганы өнөөдрийн хуралдаанаар Засгийн газрын 2020-2024 оны үйл ажиллагааны хөтөлбөрийн 2023 оны хэрэгжилт, гүйцэтгэлийн талаар хэлэлцэж байна.

Энэ үеэр УИХ-ын гишүүн Б.Баярсайхан аймгуудад баригдаж буй цэвэрлэх байгууламжийн талаар “Польш улсын хөнгөлөлттэй зээлийн хүрээнд Увс, Завхан, Баян-Өлгий, Говьсүмбэр аймагт баригдаж буй цэвэрлэх байгууламжийн ажил зогссон.

Гүйцэтгэгч компани нь санхүүжилтээ авч чадахгүй. Аймаг тус бүрд нэг сая евро дутсан гэдэг асуудал байна. Энэ асуудал хийгдэж дуусах уу” хэмээв.

Уг асуултад Барилга, Хот Байгуулалтын сайд Ц.Даваасүрэн “Завхан аймгийн цэвэрлэх байгууламжийн асуудалд хоёр шалтгаан байгаа. Энэ эхнээсээ мордохын хазгай болсон зүйл харагдсан. Тендер шалгаруулалтыг нягталж үзэх хэрэгтэй.

Тендерийн ажлын даалгаврын хүрээнд багтахгүй болчихлоо гэсэн ажлууд нь байгаа бол төсвийг нэмж өгөх ямар ч эрх зүйн үндэс байхгүй. Нэгэнт энэ ажлыг хийнэ гэж авсан бол гүйцэтгэх л ёстой. Тэр нь дутуу болчихлоо, нэмэлт хөрөнгө гээд сууж болохгүй. Ажлын хэсэг байгуулсан, шалгаад дүнгээ танилцуулах байх.

Хууль хяналтын байгууллагууд аймгуудын тендерийн асуудлыг нягтлах хэрэгтэй. Цэвэрлэх байгууламжуудын тендер заваарсан юм болсон. Дархан цэвэрлэх байгууламжийн ерөнхий гүйцэтгэгч нь хаяж яваад, хагас дутуу юм хийсэн.

Хоёрдугаарт төслийн удирдлагын асуудал байгаа. Төслийн нэгжийн удирдагчаар сувилагч мэргэжилтэй хүнийг тавьсан. Сүүлд санхүүгийн чиглэлээр суралцсан юм шиг. Иймэрхүү технологийн нарийн төслийг мэргэжлийн бус хүн авч явна гэж байхгүй.  Өмнө нь Азийн хөгжлийн банкны 8-9 аймагт хийгдсэн төсөл бүтэлгүйдсэн, ашиглалтын явцад хүндрэл гарсан” хэмээлээ.


Холбоотой мэдээ

© 2024 Бүх эрх хуулиар хамгаалагдсан. gereg.mn