‘Inverted Jenny’ гэгддэг ховор шуудангийн марк дуудлага худалдаагаар худалдан авагчийн урамшуулал дээр нэмээд 2 сая доллараар зарагдсан нь АНУ-д нэг марк хамгийн өндөр үнээр зарагдсан дээд амжилтыг тогтоожээ. Дуудлага худалдааны үнэ, өөрөөр хэлбэл хураамжийг тооцохгүйгээр 1.7 сая ам.доллар болсон аж. ARTnews агентлагийн мэдээлснээр, дуудлага худалдааг марк, ховор үнэт эдлэлийн худалдаагаар мэргэшсэн Роберт А.Сигелийн дуудлага худалдааны төвөөс явуулсан байна.
Худалдсан марк нь 1918 онд Вашингтон, Филадельфи, Нью-Йорк хотуудын хооронд тогтмол шуудангийн үйлчилгээ нээгдсэний дурсгалд зориулан АНУ-ын шуудангийн албанаас гаргасан 100 орчим маркны нэг ажээ. Хэвлэх үйлдвэрт марк үйлдвэрлэх гэж яарсаны улмаас 100 марк бүхий нэг хуудсыг алдаатай хэвлэжээ. Curtiss JN-4 онгоцны зураг дээрээс доошоо харагджээ. Энэхүү гэмтэлтэй марк нь АНУ-ын филателийн түүхэн дэх хамгийн алдартайд тооцогддог бөгөөд ‘Inverted Jenny’ худалдаа нь цуглуулгад их ач холбогдолтой юм.
Дуудлага худалдааны төвийн тэргүүн Скотт Трепел хэлэхдээ, энэ удаад зарагдсан марк нь “эдгээр 100 маркийн хамгийн сайн жишээ” юм гэжээ. Түүний хэлснээр багц дахь бусад бүх маркийг хайж, туршиж үзсэн бөгөөд бусад бүх зүйлийг “үүнтэй харьцуулах боломжгүй” гэдэгт итгэлтэй байгаа тул 2 сая долларын үнэ нь чанарыг илтгэх ажээ. Энэхүү дээд амжилтыг эвдэхээс өмнө Роберт А. Сигелийн дуудлага худалдааны газар ‘Inverted Jenny’–тэй аль хэдийн харьцаж байжээ. Энэ багцаас нийт 66 марк эндээс дамжин худалдаалагджээ. Тодруулбал, 2005 онд дөрвөн ширхэг ийм марк 2,7 сая ам.доллараар, 2018 онд тусдаа нэг ширхэг марк 1,35 сая ам.доллараар зарагдсан байна.
