Н.Учрал: Цахимжуулалтаар Орхон аймгийг улсын хэмжээнд жишиг аймаг болгох боломжтой

2023-09-04

Өнгөрөгч амралтын өдрүүдэд Цахим хөгжил, харилцаа холбооны сайд Н.Учрал Орхон аймагт ажиллаж, цахимжуулалтын чиглэлээр хийж хэрэгжүүлж буй ажилтай танилцлаа.
Тодруулбал, тэрээр ХУРДАН цэг, Цахим төв, Мэдээлэл шуурхай удирдлагын төвийн үйл ажиллагаатай танилцахын зэрэгцээ орон нутгаас хэрэгжүүлж буй “Цахим-Эрдэнэт” хөтөлбөрийн хэрэгжилттэй танилцаж, мэдээлэл сонсов.

Орхон аймаг Засгийн газрын бодлого цахим шилжилтийн хэрэгжилтийг хангах чиглэлээр нэлээдгүй санал санаачилгатай ажиллаж буй. Тэдгээрийн нэг нь “Цахим Эрдэнэт” хөтөлбөр юм. Хөтөлбөрийн хүрээнд 17 арга хэмжээг хэрэгжүүлэхээр төлөвлөснөөс одоогийн байдлаар “ Смарт Эрдэнэт” платформ, Эрдэнэт газар зүйн мэдээллийн сан, Мэдээллийн аудит, Бизнес хөгжүүлэлт зэрэг 5 арга хэмжээг бүрэн хэрэгжүүлээд байгаа билээ.


Сайд Н. Учрал  “Цахим Эрдэнэт” хөтөлбөрийг амжилттай хэрэгжүүлж байгаа Орхон аймгийг  улсын хэмжээнд жишиг аймаг болгох боломжтой” хэмээн  онцлон хэлсэн.

Өнгөрсөн тавдугаар сард иргэдэд төрийн үйлчилгээг түргэн, шуурхай чирэгдэлгүй хүргэх зорилтын хүрээнд өмнө нь ажиллаж байсан “Нэг цэгийн үйлчилгээний төв”-ийг орон нутгийн санхүүжилтээр шинэчлэн засварлаж “Цахим төв” болгон  ашиглалтад оруулсан.  Тус төвөөс төрийн 215 үйлчилгээг 24 цагийн турш  авч байна.

Аймгийн Засаг даргын санаачилгаар иргэдэд төрийн үйлчилгээг ойртуулах зорилтын хүрээнд төрийн анхан шатны нэгж Багуудад цахим үйлчилгээг нэвтрүүлсэн анхны аймаг гэдгийг  Цахим хөгжил харилцаа холбооны сайд Н.Учрал  онцолж, сайшаасан.

Энэхүү ажлын хүрээнд  Баян-Өндөр, Жаргалант сумын 29 багт “Иргэний цахим булан”-тай болсон билээ.  “Багийн хөгжлийг дэмжих хөтөлбөр”-ийн хүрээнд уг ажлыг зохион байгуулж, орон нутгийн төсвийн 58 сая төгрөгийн хөрөнгө  оруулалтаар шаардлагатай техник хэрэгсэлээр хангаж, төрийн үйлчилгээг иргэдэд ойртуулсан билээ.
Манай аймагт “ХУРДАН” цэг нээгдсэнээр 25500 иргэн төрийн үйлчилгээ авч, 118 сая төгрөгийг улсын төсөвт төвлөрүүлжээ. Аймгийн 110 гаруй мянган иргэн, төрийн 35 байгууллагын 440 орчим үйлчилгээ, 94 төрлийн лавлагаа, тодорхойлолтыг операторын горимоор нэг дороос авч байна.

Холбоотой мэдээ