Жу Жон Ху: Улаанбаатар, Солонгос руу явж цаг хугацаа алдах хэрэггүй. Орхон аймагт бүх талын боломж бүрдлээ

2023-07-20

Орхон аймгийн Засаг дарга С.Батжаргал эрүүл мэндийн аялал жуулчлалыг хөгжүүлэхээр зорьж буй аж. Үүнийхээ хүрээнд БНСУ-ын Бусан, Дэгү хотын эмнэлгийн салбартай хамтын ажиллагааг өнгөрсөн тавдугаар сард эхлүүлж, санамж бичиг үзэглэсэн байна. БНСУ-ын “World media and Beauty” группийн захирал Жу Жон Ху эдгээр өдрүүдэд Орхон аймагт зочилж БОЭТ-д Алсын зайн оношилгооны төвийг байгуулаад байгаа аж.  Хоёр хотын эрүүл мэндийн салбарын  хамтын ажиллагааны талаар ноён Жу Жон Хутай ярилцсаныг хүргэж байна.

-Дэгү хот эрүүл мэндийн тусламж үйлчилгээгээрээ улсдаа тэргүүлдэг хотуудын нэг. Эрүүл мэндийн салбарынхаа тэргүүлэх системийг Орхон аймагт нэвтрүүлж байгаад олон хүн талархан хүлээн авч байна. 
-Тэгэлгүй яах вэ. Орхон аймгийн  удирдлагууд ард иргэдийнхээ эрүүл мэндийн төлөө хийж байгаа маш чухал ажлуудын нэг гэж би харж байна.  Дэгү хотын хоёр дахь нэр нь эрүүл мэндийн хот юм. Сөүлийн дараа улсын хамгийн том эмнэлгийг байгуулсан,  олон төрлийн эрүүл мэндийн тусламж үйлчилгээ үзүүлдэг, зуун жилийн түүхтэй эмнэлгүүд төвлөрсөн хот. БНСУ-ын тэргүүлэх эмч нар бүгдээрээ Дэгү хотын эрүүл мэндийн салбарт ажиллаж байсан, энэ хотоос гаралтай хүмүүс байдаг нь тэр хэрээрээ энэ хотын  эмнэлэг болоод эмч нарын ур  чадварыг илэрхийлнэ гэж бодож байна. Орхон аймгийн БОЭТ-д байгуулж буй  Алсын зайн оношилгооны төвөөр өвчтөнүүдийг эмчлэхээс гадна эмч мэргэжилтнүүдийн мэдлэг ур чадвар дээшлэх гээд  олон давуу тал бий болж байгаа юм.

Хагалгааны  явцад  яаралтайгаар Дэгү хотын эмч нартай холбогдож заавар зөвлөгөө авах, ямар өвчний оноштойгоос шалтгаалан уух эмийг нь хүртэл зөвлөх гээд олон зүйлийг хэлж болно.

Онош тодорхойлогдохгүй хүн Улаанбаатар эсвэл Солонгос руу явж цаг хугацаа алдах хэрэггүй. Орон нутагтаа өвчнөө оношлуулах боломж нь бүрдлээ. Үүний цаана мөнгө санхүү, цаг хугацаа хэмнэнэ. Өвдөж, шаналж байгаа хүнд хамгийн чухал зүйл цаг хугацаа шүү дээ. Орхон аймгийн ард иргэд төдийгүй хөрш зэргэлдээ аймгууд цаашлаад Монгол Улсын иргэдийн амь нас эрүүл мэндийг авран хамгаалахад ихээхэн хувь нэмрээ оруулна гэдэгт итгэлтэй байна.

Мөн хамтын ажиллагааны хүрээнд аймгийн эмч, мэргэжилтнүүдийг чадавхжуулах сургалтад хамруулах гэхчлэн төлөвлөсөн зүйлс бий.

-Орхон аймаг, Дэгү хот эрүүл мэндийн салбарын  хамтын ажиллагаагаа өнгөрсөн тавдугаар сард эхлүүлсэн. Хамтын ажиллагааны хүрээнд  эдгээр өдрүүдэд Та  манай аймагт зочилж байна. Энэ удаагийн зорилгоосоо хуваалцахгүй юу? 
-Өнгөрсөн тавдугаар сард Засаг дарга С.Батжаргал тэргүүтэй албаныхан манай хотод зочилсон. Энэ үеэр Засаг дарга Дэгү хотын эрүүл мэндийн салбартай хамтран ажиллах хүсэлтэй байгаагаа илэрхийлж, энэ талын нэлээдгүй уулзалт ярилцлагуудыг хийгээд буцсан. Аймаг орон нутгийнхаа эрүүл мэндийн салбарыг хэрхэн,яаж хөгжүүлэх вэ гэдэг чин хүсэл эрмэлзэлтэй байсан нь бидэнд ихээр таалагдсан.
Миний бие энэ удаа Орхон аймаг, Эрдэнэт хотод ирсэн зорилго маань БОЭТ-д  Алсын зайн оношилгооны төвийг байгуулж, төхөөрөмжөө суурилуулахаар ирсэн. Төхөөрөмжөө сервер  системтэй нь суурилуулж  Дэгү хотын эмнэлгийнхэнтэй холбогдож тест хийж үзлээ. Миний төсөөлөл, бодит байдал хоёр ялгаатай байсан байна. /Инээв/ Өөрийн биеэр ирээд харахад орчин болон интернэтийн хурд үнэхээр сайн байлаа. Улаанбаатарын манай оффисоос ч илүү сайн байна. /Инээв/
Юу гэх гээд байна вэ гэхээр цаг хугацаа алдахгүй, яаралтай оношилгоо  эсвэл мэс заслын үед Орхон аймгийн БОЭТ-ийн интернэт ямар ч асуудалгүй юм байна гэдгийг хараад миний санаа амарсан.

-Алсын зайн оношилгооны төвийг орон нутагт анх удаа Орхон аймагт байгуулж буйгаараа онцлогтой. Улаанбаатар хотын гурван эмнэлэгт байгуулсан гэж  сонссон. Ямар эмнэлгүүд вэ. Мөн гарч буй үр дүнгийн талаар сэтгэгдлээ хуваалцахгүй юу? 
-Алсын зайн оношилгооны төвийг Улаанбаатар хотод Цэргийн төв госпиталь, “Номун” эмнэлэг, Хавдар судлалын үндэсний төв дээр байгуулсан. Тухайлбал,  “Номун” эмнэлэг БНСУ-ын Чонбугийн их сургуулийн эмнэлэгтэй хамтарч хавдрын тохиолдлуудыг илрүүлж байна.  Мөн онош тодорхойгүй өвчтөнүүдийн оношийг тодорхойлж иргэдийн амь нас аврах эмчилгээнүүдийг хийж байна. Хана эмнэлэгтэй холбогдож эхо оношилгоо хийх гэхчлэн бодит үр дүнг тоочоод баршгүй.

-Орхон аймаг, Дэгү хотын хамтын ажиллагааны хүрээнд сургалт зохион байгуулна гэсэн энэ талаар дэлгэрэнгүй мэдээлэл өгөхгүй юу. Манай аймагт үений дурангийн оношилгоо шинжилгээ маш хэрэгцээтэй байгаа. Мөн эрүү, нүүрний гажиг заслын эмч. Энэ мэт дутагдалтай чиглэлээрээ эмч мэргэжилтнүүдээ бэлтгэх, мэргэшүүлэх боломжтой юу? 
-Чухал сэдэв байна. Эрүү нүүрний гажиг заслын эмчийн тухайд боломжгүй гээд  хэлсэн нь шулуухан гэж бодож байна.  Учир нь  энэ төрлийн чиглэл  өөрөө маш хүнд.  Солонгост энэ талын эрсдэлүүд  ихээр гарсаар  байдаг. Богино хугацаанд төгс эзэмшинэ гэж байхгүй. Тиймээс энэ чиглэлээр сонирхож байгаа хүн  анхан шатнаас нь мэргэжлийн өндөр төвшинд өөрийн болгох хэрэгтэй болов уу гэж бодож байна. Харин үүний оронд шүдний эмч байж болно. Үений дурангийн оношилгоо шинжилгээгээр эмч нараа мэргэшүүлэх боломжтой. Мөн гоо сайхан, арьс гээд бусад олон төрлөөр эмч эмнэлгийн ажилтнуудын ур чадварыг дээшлүүлэхэд хамтран ажиллана.

Эцэст нь хэлэхэд, хамтын ажиллагааны үр дүнд Орхон аймгаас олон сайн эмч нар төрөн гараасай гэж хүсэж байна. Хамтын ажиллагааны нэг гол зорилго маань ч энэ юм.

Гол нь эмч нар өөрсдөө сэтгэлтэй байгаасай. Суралцъя гэсэн сэтгэл чухал. Ийм сэтгэл үгүй бол суралцаж хөгжиж чадахгүй  шүү дээ. Мөн Солонгосын эмч нар Орхон аймагт  ирж эмчилгээ хийдэг, Орхон аймгийн эмч нар Солонгос улсад очиж эмчилгээ хийдэг солилцоо өргөн хүрээтэй хөгжөөсэй гэж бодож байна. Тэр хэрээр олон, олон Монгол хүний амь нас, эрүүл мэндийг аварч тэдний гэр бүлд инээд хөөр, баяр баяслыг өгнө гэдэгт итгэл дүүрэн байна.
Энэ бүхний эхлэлийг тавьсан Орхон аймгийн Засаг дарга С.Батжаргал, Нийгмийн бодлогын хэлтсийн хамт олонд ажлын ажилт хүсэж, талархал илэрхийлье. Хамтын ажиллагааг үр дүнтэй байлгахад Дэгү хотын захиргаа, Эрүүл мэндийн аялал жуулчлалыг дэмжих төв бүхий талаар дэмжиж ажиллана гэдгээ хэлэхэд таатай байна.

Холбоотой мэдээ