Орхон аймагт өчигдөр эхэлсэн “Хамтдаа Эрдэнэт хөгжье-2023” эдийн засгийн форум хоёр дахь өдрөө “Смарт Эрдэнэт экспо” арга хэмжээгээр үргэлжилж байна.
Орхон аймаг хоёр жилд нэг удаа эдийн засгийн форумаа зохион байгуулдаг уламжлалтай. Энэ жилийн форумын онцлог нь 2021 онд цахимаар зохион байгуулсан эдийн засгийн форумаас гарсан үр дүнг бодит ажил хэрэг болгож буйгаараа онцлог болж байна.
2021 оны эдийн засгийн чуулга уулзалтаас аймаг орон нутагтаа цахимжуулалтыг эрчимжүүлж, цахим аймаг болох зорилтыг дэвшүүлсэн. Энэхүү зорилтоо бодит ажил хэрэг болгохоор аймгийн ИТХ-ын 2021 оны 20 дугаар тогтоолоор “Цахим Эрдэнэт-1” хөтөлбөрийг батлуулан хэрэгжүүлжээ.
“Цахим Эрдэнэт-1” хөтөлбөр нь 5 үндсэн зорилт 17 бүлэг ажлыг тусгасны нэг нь энэхүү “Смарт Эрдэнэт” платформ юм.
“Смарт Эрдэнэт” аппликейшн нь E-Mongolia буюу төрийн цахим үйлчилгээний нэгдсэн системийн дэд систем байдлаар орон нутгийн бүхий л үйлчилгээг нэг дор багтаасан цахим платформ гэдгээрээ онцлогтой.
Энэ үеэр “Смарт Эрдэнэт” платформийг тус аймгийн Засаг дарга С.Батжаргал танилцуулж, Орхончуудын өдөр тутмын хэрэглээнд нэвтэрч байгааг дуулгалаа.
Мөн тэрээр, “Смарт Эрдэнэт” аппликейшн хэрэглэгдэх л ёстой. Тийм ч ураас хүний өдөр тутамдаа хэрэглэдэг, хэрэгцээтэй зүйлсийг энэхүү аппликейшнд суулгаж өгсөн. Аппликейнш маань өнөөдөр нээлтээ хийлээ. Үүнийг АЙ-ТИ технологийн компаниуд, Эрдэнэтийн залуучууд түүчээлэн аваад явна гэдэгт итгэл дүүрэн байна. Цэс болгон нь “амьтай” байж, хүн бүр хэрэглэж хэвшсэн аппликейшн болно гэдэгт итгэлтэй байна” гэлээ.
Ийн Орхон аймаг иргэддээ болон аймаг орон нутагтаа зочлон ирсэн, ирэхээр зорьж буй хүн бүхэнд зориулсан гар утасны аппликейшнийг хэрэглээнд нэвтрүүлж буй анхны аймаг болж байна.
Орон нутгийн төрийн байгууллагын мэдээлэл цогцоороо “Смарт Эрдэнэт” аппликейшнд багтжээ
Тус аппликейшнийн Хотын захиргаа цэсэнд орон нутгийн төр захиргааны байгууллагаас хэрэгжүүлж буй төсөл хөтөлбөр, гаргаж буй тушаал захирамж гэхчлэн бүх мэдээллийг багтаажээ. Мөн иргэд аймаг орон нутгийнхаа хөгжилд санал өгөх, амьдарч, ажиллаж буй орчныхоо аюултай, эрсдэлтэй зүйлийг зургаар баримтжуулан мэдээлэх, өргөдөл гомдлоо гаргах цэс ч байна. Түүнчлэн Орхон аймагт шилжин ирэх хүсэлтэй иргэдийг мэдээ мэдээллээр хангаж, эргэх холбоотой ажиллах боломжийг бүрдүүлсэн “Эрдэнэтэд тавтай морил” цэсийг ч багтаажээ.
Орон нутгийнхаа 10 мянган бизнес эрхлэгчдэд үйл ажиллагаагаа тэлэх боломжийг олгож байна
“Смарт Эрдэнэт” аппликейшнээр Орхон аймгийн 10 мянган бизнес эрхлэгчдийнхээ харилцагч, хэрэгэлэгчдийн хүрээг тэлэх боломжийг олгожээ. Бизнесийн чиглэл тус бүрээр категор үүсгэж ангилан өөрийн бизнес, аж ахуйн нэгж байгууллагын мэдээлэл, бүтээгдэхүүн үйлчилгээгээ танилцуулах боломжийг олгож байна. Өөрөөр хэлбэл, Эрдэнэт хотдоо үйлдвэрлэл эрхлэгч иргэн бүрт бараа бүтээгдэхүүнээ зарж, борлуулах бүрлуулалтын сувгийг нээж өгж байна. Өрхийн үйлдвэрлэл эрхлэгч, хоршоод, албан байгууллагууд бүх төрлийн бараа, бүтээгдэхүүнээ нэмэлт дундын шимтгэлгүйгээр хамгийн хямд үнээр хэрэглэгчийн гарт хүргэх боломжтой.
Орхон аймаг, Эрдэнэт хотод зочилж буй бүхэнд зориулсан Аялал жуулчлалын цэс
Аялал жуулчлал цэс нь зөвхөн Эрдэнэт хотын оршин суугчид гэлтгүй, зочлон ирж буй иргэдэд шаардлагатай мэдээллийг багтаасан цэс юм. Зочид буудал, ресторанд урьдчилан захиалга өгөх боложтойгоос гадна Эрдэнэт хотын бүхий л үзвэр үйлчилгээний байгууллага, аялал жуулчлалын маршрут, амралтын газруудын мэдээллийг авах боломжтой. Мөн Эрдэнэтэд хотод зочлоод буцагсад бэлэг дурсгалын зүйлийг ч аппликейшнийн тус цэсээр дамжуулан сонгож авах боломжийг олгожээ.
Такси үйлчилгээ нь Эрдэнэт хотын иргэдийн дунд хамгийн их эрэлт хэрэгцээтэй үйлчилгээнд тооцогддог. Тиймээс ч уг үйлчилгээг орхигдуулахгүйгээр тус цэсээ баяжуулан дуудлагын жолооч, машин түрээсийн үйлчилгээг шинээр нэвтрүүлэх боломжтой болов.
Эрүүл мэндийн бүх мэдээллийг “шингээв”
Эрүүл мэнд цэснээс улсын болон хувийн эмнэлэг, эмийн сангуудын цагийн хуваарь, байршил, холбогдох мэдээлэл зэргийг харахаас гадна эрүүл мэндийн даатгалаар хөнгөлөлттэй авах эмийн жагсаалтыг харж болно. Мөн эрүүл мэндийн зөвлөмж мэдээллүүд, мөн урьдчилсан сэргийлэх үзлэгийн мэдээллүүдтэй танилцаж, эмнэлгийн цагаа аппликейшнээрээ захиалах боломжийг олгож байна.
Хог хаягдлаа ялган ангилж, дахин боловсруулах цэгт хүргүүлэх шийдэл ч бий
Хог хаягдлын менежмент, хогоо дахин боловсруулах боломжтой болсон ч иргэдийн амьдралын хэв маягт хогоо ялгах, дахин боловсруулах талаар хэвшил төдийлөн бүрдээгүй байна. Энэ асуудлыг гар утасны апп-аар дамжуулан, хог хаягдлаа ялган ангилж, дахин боловсруулах цэгт хүргүүлэх шийдлийг мөн “Смарт Эрдэнэт” аппликейшн дээр шийдэж өгчээ. Иргэн дахивар хог хаягдлаа төрөл, ангиллаар нь ангилж дуудлага өгснөөр хүргэлтийн компани танай гэрээс очиж аван дараагийн дамжлагат боловсруулах үйлдвэрт хүргэж өгөх юм.
Энэ мэтчилэн бидний иргэдийн өдөр тутамдаа хэрэглэдэг, хэрэгцээтэй бүхий л зүйлсийг тус аппликейшнд “шигтгэж” өгснөөрөө давуу талтай болжээ.
