Энэхүү наадмыг өргөн хэмжээнд, шинэлэг, үр бүтээлтэй байдлаар энэ оны тавдугаар сард зохион байгуулахаар ажлын хэсэг төлөвлөн ажиллаж байна.
Д.Нямсүрэнгийн ‘Дөрвөн цаг” шүлгэнд Монгол Улсын урлагийн гавьяат зүтгэлтэн, хөгжмийн зохиолч, төгөлдөр хуурч Б.Чинбат аялгууг хийж, Үндэсний их баяр наадмын үеэр үзэгчдэд хүртээл болгосон. Уг дууг ардын жүжигчин “Чингис хаан” хамтлагийн ахлагч Д.Жаргалсайхан, гавьяат жүжигчин Т.Ариунаа, Х.Лхагвасүрэн, залуу дуучин Ч.Мишээл нар амилуулсан билээ.
Аймгийн Засаг дарга М.Бадамсүрэн яруу найрагчдаа дэмжин “Талын шүлэг” яруу найргийн аймгийн уралдааныг жил бүр зохион байгуулах, зохиолчид, яруу найрагчдыг бүсийн болон Улсын тэмцээн, уралдаанд оролцоход дэмжлэг үзүүлэх, залуу яруу найрагчдыг бэлтгэх дугуйлан, секц ажиллуулах, МЗНЭ-ийн салбарыг оффистой болоход дэмжлэг үзүүлж ажиллахаа илэрхийллээ.
Түүний Дөрвөн цаг шүлгээс…
Д.Нямсүрэн : Дөрвөн цаг
1.
Бороо ганц нэг дусах нь сайхан
Борог өвс норсон байх нь сайхан
Хаврын цас гэр лүү урсах нь сайхан
Хаа нэгтэй шувууд ганганах сайхан.
Алтан хараацай дэргэдүүр нисэх сайхан
Аяны хүн манай уяанд буух сайхан
Айлын маань айлд бүсгүй байх сайхан
Айл нүүж ирэх сайхан.
Хангайн бороо гэнэт асгах нь сайхан
Харанхуйн дунд цахилгаан гялбах нь сайхан
Хонон өнжин бороо зүсрэх нь сайхан
Холоос гийчин ирэх сайхан.
Шаргал талын өвс халиурах нь сайхан
Шанхны үзүүрт салхи нь сэвэлзэх сайхан
Сартай шөнө бухал дээр унтах сайхан
Чамайг зүүдлээд газарт ойчих нь сайхан.
Үе үе бороо амcxийх нь сайхан
Өлгөсөн цувнаас ус дуслах нь сайхан
Үүлэн чөлөөнөөс нар гарах нь сайхан
Үүдээр болжморууд нисэн өнгөрөх нь сайхан.
Шөнө дөл хүлэг морь янцгаах сайхан
Шүлэг нойрноос сэрж орчлонг бодох сайхан
Өрхний завсраар гэгээ орох сайхан
Өглөө болох сайхан.
Цайран цайран бороо орох нь сайхан
Цавьдар морьтой хүн наашаа давхих нь сайхан
Борооноос өмнө ирлээ гэж ярих нь сайхан
Боржигон эмээлээ аваад орж ирэх нь сайхан.
Сартай толгодод ингэ гунганах нь сайхан
Шанзны үзүүрт Ай -нан-аа суух сайхан
Шаргал дөл угалзлан гал ноцох нь сайхан
Царай зүс бүдэг бадаг гэрэлтэх нь сайхан.
Хөх лонхон тогоруу дуугaрах сайхан
Хөдөө цайдам борооших сайхан
Анирхан ахуйд цэцэг дохих сайхан
Аадрын өмнөх байдал сайхан…
Тооноор сар гэрэлтэх сайхан
Тогоотой сүүнд тусах сайхан
Шөнө орой гарах сайхан
Чөдөртэй морьд туриглах сайхан.
Шиврэн шиврэн бороо орох нь сайхан
Ширэг зүлэг ногоорох нь сайхан
Зүүн өмнө солонго татах сайхан
Зүс бороо гэрэлтэх сайхан.
Гэгээн борооны усыг тосох сайхан
Гэзэг үсээ хүүхнүүд угаах сайхан
Агь хүмлийн үнэр сэнгэнэх нь сайхан
Аяcxан бодол хол ойрыг санах сайхан.
Үдшийн бүрийгээр ирэх сайхан
Үүрийн гэгээгээр явах сайхан
Өнгөт дэлхий нь уяран уйлмаар сайхан
Өргөн хорвоо нь дуулан жаргамаар сайхан.
Эх нутаг минь шүлэг шиг сайхан
Эх орон минь дуу шиг сайхан
Эргэх дөрвөн цагт амьд явах сайхан
Эрээнцавд бороо орох нь сайхан…
