Канадын эрх баригчид ОХУ-аас хөнгөн цагаан, ган зэрэг бүтээгдэхүүн импортлохыг хориглох шийдвэр гаргажээ. Энэ арга хэмжээгээр Оттава Оросын төсөвт орох орлогын урсгалыг хязгаарлаж байна гэж тус улсын Сангийн яам тэмдэглэсэн аж. 2021 онд Канад Оросоос 45 сая долларын хөнгөн цагаан, 213 сая долларын ган бүтээгдэхүүн импортолсон байна.
Канад улс “Канадын аль ч хүн болон Канадад амьдардаг бусад канад хүн”-д Оросын төмөр, ган бүтээгдэхүүн, хөнгөн цагаан, хөнгөн цагааны бүтээгдэхүүн импортлох, худалдан авахыг хориглов. Уг шийдвэрийг Канадын Засгийн газрын цахим хуудсанд нийтэлжээ. Уг арга хэмжээ нь шийдвэрийг нийтэлсэн өдрөөс эхлэн хүчин төгөлдөр болсон аж.
Түүнчлэн “хориотой үйл ажиллагаа”-г сурталчлах юм бол хориг арга хэмжээг зөрчсөн гэж үзнэ. Үүний зэрэгцээ эдгээр арга хэмжээ хүчин төгөлдөр болохоос өмнө байгуулсан гэрээнд хориг арга хэмжээ авахгүй гэдгийг тэмдэглэжээ.
Канад хамгийн сүүлд Украинд Оросын “тусгай ажиллагаа” эхэлсний ойн өдөр буюу хоёрдугаар сарын 24-нд хориг арга хэмжээ авсан. ОХУ-ын Тэргүүн шадар сайд Андрей Белоусов, Шадар сайд Татьяна Голикова, Виктория Абрамченко, ОХУ-ын Ерөнхийлөгчийн туслах Дмитрий Чернышенко, Тээврийн сайд Виталий Савельев, Төрийн Думын депутатууд, түүнчлэн бизнесмен Алексей Мордашовыг гэр бүлийнхэнтэй нь Нисанов, Андрей Мельниченко нарын хамт гээд 129 хүн хоригт орсон байна..
Үүнээс гадна ФСБ, Нэгдсэн Орос нам, Төрийн Дум, Холбооны зөвлөл, Росфинмониторинг, Уралвагонзавод зэрэг байгууллагууд хориг арга хэмжээний жагсаалтад багтсан байна. Канадын Ерөнхий сайд Жастин Трюдогийн цахим хуудсанд Оросын батлан хамгаалах салбартай холбоотой хэдэн арван аж ахуйн нэгжид хязгаарлалт хийсэн гэж тэмдэглэжээ.
Канад дахь ОХУ-ын Элчин сайд Олег Степанов хариуд нь эдгээр хориг арга хэмжээг “утгагүй” гэж нэрлэсэн бөгөөд түүний хэлснээр Оросын эрх баригчид барууны хориг арга хэмжээг хууль бус, “галзуу, бодлогогүй” гэж үзэж байна. “Тэд [хориг арга хэмжээ] хэзээ ч Оросын эсрэг үйлчилж байгаагүй, манай бүрэн эрхт гадаад бодлого, дотоод харилцаанд нөлөөлж чадахгүй” гэж дипломат төлөөлөгчийн газар Твиттер хуудсандаа мэдэгджээ.
