“Эрдэнэс Тавантолгой” ХК Монголын хөрөнгийн биржтэй хамтран экспортод гаргах нүүрсний анхны цахим арилжааг өнөөдөр зохион байгуулжээ. Энэ удаа 32 мянган тонн коксжих нүүрсийг арилжжээ.
“Эрдэнэс Тавантолгой” ХК БНХАУ-ын талд уурхайн амны үнээр нэг тонн нүүрсийг 109 ам.доллароор борлуулж ирсэн бол өнөөдөр хил нөхцөлөөр нэг тонн нүүрсийг 179.1 ам.доллароор борлуулсныг тус компани мэдээллээ.
Өчигдөр УУХҮ-ийн сайд Ж.Ганбаатар Засгийн газраас гаргасан шийдвэрийг танилцуулах үеэр “Монголын Хөрөнгийн биржийг түшиглээд нүүрсээ зарах шийдвэрийг гаргалаа. Маргааш “Эрдэнэс Тавантолгой” ХХК гурван удаагийн дуудлага худалдаагаар 21 компанид ойролцоогоор 130-140 мянган тонн нүүрс зарна. Энэ нь нэг сарын хэрэглээний нүүрс.
Долдугаар сарын 1-н гэхэд Монгол Улсын нийт нүүрсийг 36 сая тонн гэж үзвэл 12 сая тонныг биржээр зардаг болох зорилт тавьж байна. 2024, 2025 онд бүх нүүрсээ биржээр зардаг болно” гэж байв.
