Өнөөдрийн/2022.12.12/ Засгийн газрын хуралдаанаар нүүрсний хулгайн асуудлаар олон улсын аудит оруулахаар шийдвэрлэжээ. Дэлхийн топ аудитын компаниудын аль нэгийг сонгон шалгаруулж, санхүүгийн үйл ажиллагаанд нь иж бүрэн шалгалт оруулна гэв.
Мөн “Эрдэнэс Тавантолгой”-г олон нийтийн компани болгох чиглэлд ЗГХЭГ-ын дарга Д.Амарбаясгалангаар ахлуулсан Ажлын хэсэг гаргахаар болжээ.
ХЗДХ-ийн сайд Х.Нямбаатар:
Эрдэнэс Тавантолгой компанийн хувьд үйл ажиллагаа явуулсан 12 гаруй жилийн хугацаанд 12.8 их наядын борлуулалтыг хийсэн нь мөрдөн шалгах ажиллагааны явцад баталгаажсан. Хичнээн төгрөгийн оффтейк гэрээ хийгдсэн нь ийнхүү олон нийтэд ил болж байна. Хүмүүсийн нэрийг зарла гээд байгаа. Хэрэгт холбогдон шалгуулж байгаа албан тушаалтнуудыг болон хэргийн талаар товч мэдээллийг маргаашдаа багтаж хуулийн байгууллагаас өгөхөөр төлөвлөж байна.
Өнөөдрийн Засгийн газрын ээлжит хуралдаанаас Үндэсний аюулгүй байдлын тухай хуульд өөрчлөлт оруулах хуулийн төслийг Лхагва гарагт болох хуралдаанд оруулж ир гэсэн үүрэг даалгаврыг Ерөнхий сайд өгсөн.
Тодруулбал Үндэсний Аюулгүй Байдлын Зөвлөл/ҮАБЗ/-өөс аж ахуйн ахуйн зориулалттай гэрээ хэлцэл байгуулах талаар зөвлөмж гаргахыг хориглосон зохицуулалтыг хуулийн төсөлд оруулахаар Хууль зүй, дотоод хэргийн яаманд ажлын хэсэг дөнгөж сая байгуулагдаж байна. Энэ нь том агуулгатай өөрчлөлт биш.
Цаашид ҮАБЗ-ийн зөвлөмжөөр аж ахуйн шинжтэй гэрээ хэлэлцээр байгуулахыг Засгийн газарт даалгасан зөвлөмж гаргахгүй байхаар хуульчлах юм. Үүнийг дагаад Төрийн болон албаны нууцын тухай хуульд давхар өөрчлөлт орно. Энэ төрлийн бичиг баримтыг төрийн нууцад авахгүй байхаар өөрчлөлтийг оруулна.
