“Дарханы төмөрлөгийн үйлдвэр”-ийг төрд авах шийдвэрийг Засгийн газар гаргаснаас хойш гурав дахь даргынхаа нүүрийг үзэж байна. Мэргэжилтнүүдийн зүгээс дарга солигдсон ч асуудал нь дуусахгүй, энэ өвөл ажиллахгүй байх нөхцөл үүсч болзошгүй гэж мэдээлж байгаа ажээ.
Дархан дахь төмөрлөгийн үйлдвэр төрд очсоноос хойш гурав дахь даргаа хүлээн авчээ. Төрийн өмчийн бодлого зохицуулалтын газрын дарга Б.Цэнгэлийн тушаалаар “Дарханы төмөрлөгийн үйлдвэр”-ийн захирал А.Ариунболдыг чөлөөлж, Г.Дугаржавыг томилжээ.
Засгийн газраас “Кью Эс Си” ХХК-ийн эзэмшиж байсан “Дарханы төмөрлөгийн үйлдвэр” концессын гэрээг цуцлах шийдвэр гаргасан. Ийн шийдвэр гарсны дараа “Дарханы төмөрлөгийн үйлдвэр”-т даргаар ТӨБЗГ-ын бодлого төлөвлөлт, хөрөнгө оруулалтын газрын дарга Ц.Шинэхүүг түр орлон гүйцэтгэгчээр томилж байв.
Өнгөрсөн дөрөвдүгээр сард ТӨБЗГ-ын дэд даргаар ажиллаж байсан А.Ариунболдыг томилж байсан юм. ТӨБЗГ-аас “Дарханы төмөрлөгийн үйлдвэр”-ийн өмчийг төрд хүлээн авах процесс үргэлжилж байна.
Г.Дугаржав нь МАХН-ын Ерөнхий нарийн бичгийн даргаар ажиллаж байсны хувьд Ерөнхийлөгч асан Н.Энхбаяртай ойрын хүн гэгдэг. МАН, МАХН нэгдсэн тохирооны хүрээнд “Дарханы төмөрлөгийн үйлдвэр”-ийг өгөх асуудал яригдсан гэх албан бус мэдээлэл ийн албажиж, Г.Дугаржавыг томилсон байна.
