Иргэн Э.Одбаяр хэвлэлд ярилцлага өгөхдөө “Дабль стандартыг эсэргүүцсэн залуус өөрсдөө түүнийхээ хохирогч нь болоод явж байна” гэж байв. Хуулийн өмнө хүн бүр эрх тэгш байхыг шаардаж буй “Nodoublestandart” хөдөлгөөний Э.Одбаяр, Г.Ган-Очир, Ц.Чинбат, Б.Билгүүн, Л.Ганхөлөг нар цагдан хорих 461 дүгээр ангид халдаж, хүч хэрэглэн хүн оргуулсан гэх шүүх хурал Баянгол дүүргийн Эрүүгийн хэргийн анхан шатны шүүхийн байранд болсон.
Шүүхээс тэдэнд холбогдох хэргийг прокурорт буцаах шийдвэр гаргасан талаар Э.Одбаяр мэдээлж байлаа. Шүүх хурлын урьдчилсан хэлэлцүүлэг нэгдүгээр сарын 5-нд Баянгол дүүргийн Эрүүгийн хэргийн анхан шатны шүүхийн байранд болж, шүүх хурлын товыг зарласан. Тэднийг гурван жил хүртэл хорих ялтай эрүүгийн хэрэгт буруутгаад буй.
Нийслэлийн прокуророос Ц.Чинбат, Б.Билгүүн, Э.Одбаяр нарыг яллагдагчаар татсан тогтоолд найруулгын өөрчлөлт оруулж “461 дотор гар утсаар бичлэг хийж” бүлэглэн хууль сахиулагчийг эсэргүүцсэн болгон өөрчилжээ. Тэд зохиомол хэрэг гэж үзэн гарын үсэг зурахаас татгалзсан байна.
