ОБЕГ-ын мэдээлснээр Бууцагаан суман дахь Гал түймэр унтраах, аврах 72 дугаар ангийн алба хаагчдыг очиход Улаанбаатар хотоос Ховд аймгийн Цэцэг сум чиглэлд 21 зорчигчтой зорчиж явсан KLQ6898 загварын автобус замын хажуу руу унасан байжээ. Алба хаагчид талийгаачийн цогцсыг гаргаж цагдаагийн байгууллагад шилжүүлсэн байна.
Энэ тухай аймгийн Онцгой байдлын газрын дарга, хурандаа Ж.Алтангэрэл “Баянхонгор аймгийн төвөөс баруун тийш 145 километрийн зайд осол гарсан. Улаанбаатар хотоос энэ оны дөрөвдүгээр сарын 26-ны 12:00 цагт гарч, Ховд аймгийн Хөшөөтийн уурхай руу зорчиж явсан “Мега сервес” ХК-ны ажилчдын 43 хүний суудалтай автобус замын хажуу руу унасан тухай дуудлага өглөө 05:00 цагт Бууцагаан сумын Онцгой байдлын газарт ирсэн. Энэ дагуу манай аврах ангийн бүрэлдэхүүн газар дээр нь очиход автобус замын хажуу руу унасан, хүмүүс шоконд орсон байсан. Зарим нь автобуснаасаа гарч чадсан байсан.
Ослын улмаас нэг хүн амь насаа алдсаныг эмнэлэг, цагдаагийн байгууллагад шилжүүлсэн бол 12 хүн гэмтсэн. Тэдний 5 нь нэн хүнд, 7 нь хүндэвтэр байгаа юм. Аймгийн төвөөс мэргэжлийн эмч нар ирж, автобусанд зорчиж явсан хүмүүсийг Бууцагаан сумын төвд хүргүүлсэн.
“Мега сервес” ХК-иас Улаанбаатар хот руу нисэх онгоц захиалсан тул 11:00 цагаас хөөрнө. Одоогоор аймгийн эрүүл мэндийн төвөөс гэмтсэн хүмүүсээ биеийн байдлаар нь ангилж, Улаанбаатар хот руу хүргүүлж эмчилгээ хийлгэхээр ажиллаж байна” гэлээ.
Урьдчилсан байдлаар ослын шалтгааныг мэдээлэх боломжгүй гэдгийг аймгийн Онцгой байдлын газраас мэдээлэв. Одоогоор цагдаагийн газраас шалгалтын ажиллагааг эхлүүлээд байгаа аж.
