Хөвсгөл аймгийн Мөрөн сумын хот тохижилт үйлчилгээний төвийн ажилчид цалингаа нэмэгдүүлэх хүсэлтээ илэрхийлж, тайван жагсаж байна. Цалингаа нэмэгдүүлэх хүсэлтээ аймаг, сумын удирдлагууддаа албан бичгээр хүргүүлжээ.
Засвар, үйлчилгээ хариуцсан менежер Б.Чингүүнжав:
Арванхоёрдугаар сарын 1-нд аймаг, сумдын ИТХ, аймаг, сумын Засаг дарга нарт цалин хөлсөө нэмэгдүүлэх хүсэлтээ илэрхийлсэн. Хот тохижилтын ажилчид:
- Жолооч 450 мянган
- Хог ачигч, зам талбайн үйлчлэгч 390-410 мянган төгрөгийн цалин авдаг.
Үүнийг нэмэгдүүлэх хэрэгтэй.
12 дахь жилдээ хог ачигч хийж буй Б.Цогтсайхан:
Сүүлийн үед өргөн хэрэглээний бараа өсөж, хоёр нарны хооронд ажиллаад 410 мянган төгрөгийн цалин авдаг. Цалингаа нэмэгдүүлэхийг хүсэж тайван жагсаал хийж байна. Зун өглөө үүрийн 05:00 цагаас оройны 16:00 цаг, өглөө 08:30 цагаас эхэлж 18:30 гэж буудаг. Хоёр, гурван нам солигдохдоо цалин нэмнэ гэдэг боловч гараад л мартчихдаг. Түлээний мөнгө 450 мянган төгрөг гэж байна. Бид нарын цалин түлээндээ ч хүрэхгүй байна. Цалингийн зээлдээ 350 мянгыг нь өгдөг.
10 дахь жилдээ зам, талбайн үйлчлэгч хийж буй А.Энхжаргал:
Сүүлийн гурван жилд хөдөлмөрийн хөлсний доод хэмжээгээр цалинжаж байгаа нь хаанаа ч хүрэхгүй байна. Бидний 400 мянган төгрөг хаанаа ч хүрэхээ байсан. Бид халуунд ч, хүйтэнд ч ажлын байран дээрээ байж байдаг. Бидэнд орж дулаацах ч газар байдаггүй.
Эх сурвалж: “Хөвсгөлийн өнгө”