УИХ-ын гишүүд хүчирхийллийн эсрэг аянд нэгдэж энгэртээ цагаан туузаар жигдэрчээ

2020-12-11

Өнөөдрийн/2020.12.11/ УИХ-ын чуулганы нэгдсэн хуралдаанаар гишүүд энгэртээ цагаан тууз зүүж, ширээн дээрээ зөөлөн тоглоом тавьжээ.

УИХ-ын гишүүн Б.Баярсайханы тэргүүлдэг “Хүчирхийллийн эсрэг лобби” бүлгийн санаачилгаар дэлхий даяарх охид эмэгтэйчүүдийн хүчирхийллийн эсрэг эрчүүдийг хамарсан хамгийн том хөдөлгөөн болох “Цагаан туузтны аян”-д Монгол Улс, тэр дундаа Монгол Улсын парламент дэмжин нэгдэж буйгаа ийнхүү илэрхийлсэн юм.

Энэхүү аянг УИХ дахь “Хүчирхийллийн эсрэг лобби бүлэг”, УИХ дахь “Эмэгтэй гишүүдийн бүлэг”, Хүчирхийллийн Эсрэг Үндэсний Төв, Монфемнет, “Эрчүүд Эрүүл Гэр Бүл Төв” ТББ, People In Need олон улсын байгууллагууд хүчирхийллийг үл тэвчдэг эрэгтэйчүүдийг уриалан охид, эмэгтэйчүүдийн эсрэг хүчирхийлэл үйлдэхгүй, хүчирхийллийн хажуугаар дуугүй өнгөрөхгүй, хүчирхийллийг бүх арга замаар зогсоохыг дэмжин нэгдэн эхлүүлсэн байна.

 

 

УИХ дахь Хүчирхийллийн эсрэг лобби бүлгийг Б.Баярсайхан гишүүн тэргүүлдэг бөгөөд гэр бүл, хүүхэд, эмэгтэйчүүдийн эсрэг хүчирхийллийг таслан зогсоох, эрх зүйн орчныг сайжруулах чиглэлд хамгийн их дуугарч, хүчирхийлэлтэй тэмцэж байгаа төрийн болон төрийн бус байгууллагуудтайгаа харилцаатай байж, ойр ажилладаг юм. Түүний санаачилгаар Лантуун дохио төрийн бус байгууллагын Ид шидийн орон төвийн үйл ажиллагааг дэмжих зорилгоор УИХ-ын гишүүд тус ТББ-ынханы хийсэн картны арьсан хэтэвч, Тусгай хэрэгцээт хүүхдүүдийн эцэг эхчүүдийн урласан чихмэл тоглоомон амьтдыг худалдан авч тэдний үйл ажиллагааг дэмжсэн байна.

УИХ-аас жендерт суурилсан хүчирхийллийг зогсоох, хүүхэд хамгааллын хуулийг боловсронгуй болгох чиглэлээр бодлогын томоохон өөрчлөлтүүдийг 2021 онд хийхээр төлөвлөж байна.

Мөн УИХ-ын гишүүд тусгай хэрэгцээт хүүхдүүдийн эцэг эхийн урласан зөөлөн тоглоом болон нэрийн хуудасны арьсан хэтэвчийг худалдан авчээ. Үүнээс олсон орлогыг “Ээлтэй ертөнц” ТББ-ын дэргэдэх байнгын асаргаа шаардлагатай хүүхэдтэй асран хамгаалагчдад болон “Лантуун дохио” ТББ-ын үйл ажиллагаанд дэмжлэг болгон хандивлах юм.

Эх сурвалж:Vip76.mn

gereg.mn

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ