• “COVID-19-ийн эрсдэл маш өндөр байгаа тул иргэдийг амны хаалт зүүж, гараа тогтмол угаахыг зөвлөж байна”

    2020-11-06

    COVID-19-ийн халдварын эрсдэл нэмэгдэж, Монгол Улсад өдөр бүр коронавирусийн тохиолдол бүртгэгддэг боллоо гэдгийг ХӨСҮТ-ийн Тандалт, судалгааны албаны дарга А.Амбасэлмаа өнөөдрийн хэвлэлийн хурлын үеэр хэллээ.

    “Түүнээс гадна халдвартын клиникт ажиглалт тандалтад байсан хүн өвчилсөн тохиолдол гарлаа. Иргэд энэ тохиолдолд зөв ойлголт авах хэрэгтэй. Бид халдвартай хүмүүсийг эмчилж байгаа эмчилгээний багийн хүмүүсийг 14 хоног эмчилгээ хийсний дараа 14 хоног тэнд нь тусгаарладаг.

    Дэлхий дахинаа эмнэлгийн эмч ажилчид халдварт өртөх эрсдэл маш өндөр байгаа. Харин Монгол Улс энэ эрсдэлийг бусад улсаас ч илүү онцгой анхаарч, тусгаарлаж буй хэрэг юм. Өөрөөр хэлбэл, тухайн сувилагчийн ажиглалт тусгаарлалтад байх хугацааны хяналтын шинжилгээнээс  нь коронавирус илэрсэн гэсэн үг” гэлээ.

    Мөн тэрбээр “Коронавируст халдварын эрсдэл маш өндөр байгаа тул иргэд өөрсдийгөө өвчлүүлэхгүй байх, ойрын хүмүүсээ халдварт өртүүлэхгүй байх тал дээр онцгой анхаарч эрүүл мэндийн байгууллагаас өгсөн зөвлөмжийг дагаж, хүн бүхэн амны хаалт зүүж, гараа тогтмол угаахыг зөвлөж байна.

    Иргэд өмнө нь 2020 оны нэгдүгээр сараас гуравдугаар сарын хооронд зөвлөмжийг маш сайн дагаж байсны учир халдвараас сэргийлж чадсан. Тэр үе рүүгээ эргэж ороосой гэж хүсэж байна.

    Коронавирусийн эсрэг вакцин гараагүй байгаа энэ үед найдвартай хамгаалах зүйл бол амны хаалт гэдгийг иргэд маш сайн ойлгох хэрэгтэй. Тиймээс амны хаалтаа зүүе гэж уриалж байна” хэмээлээ.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ