Д.Тогтохсүрэн:Гишүүд бензин авахдаа ч заавал ТББ-аар дамжуулах ЖУРАМТАЙ байдаг

2020-11-02

УИХ дахь МАН-ын бүлгээс цаг үеийн асуудлаар мэдээлэл хийлээ.

-Яг ямар ААН-үүдийг  хувьчилж, 2021 оны төсөвт орлого болгохоор байгаа вэ?

УИХ-ын гишүүн Б.Жавхлан:

-2021 оны төсөвт хувьчлалын орлого гэж байхгүй байгаа. ТӨҮГ, Улсын үйлдвэрүүд газрууд гээд маш олон статустай байдаг. Том, жижиг нийлээд 500 байдгаас 106-ыг нь Төрийн өмчийн бодлого зохицуулалтын газар шууд удирддаг. Дэд бүтэц, эрчим хүчийн чиглэлийн ТӨҮГ-ууд нь яамдынхаа харъяанд оччихсон.

2021 онд бүтцийн өөрчлөлт хийх, хувьчлах, татан буулгах зэрэг шинэчлэлүүд явагдахаар 2022 оны төсөв дээр орж ирэх болов уу.

-УИХ-ын Тамгын газрын санхүү хэтэрхий задгай байна гэж харахгүй байна уу. 500 орчим ТББ-тай хоёр тэрбумын гэрээ хийж байна. Энэ асуудлаар бүлэг ямар байр суурьтай байгаа вэ?

УИХ-ын гишүүн, МАН-ын бүлгийн дарга Д.Тогтохсүрэн:

-УИХ-ын гишүүдийн төсөвтэй холбоотой мэдээлэл асууж байна уу гэж бодож байна. УИХ-ын гишүүний төсөв гишүүний цалин, туслахуудын зардал, тойрогт ажиллах зардлаас бүрддэг.

Өмнөх их хурлуудын үед гарсан, заавал ТББ-аар дамжуулна гэсэн санхүүгийн журамтай.

Бензинээ авах байсан ч ТББ-аар дамжуулдаг, тойрогтоо ажиллах зардал ч гэсэн ТББ-аар дамжуулдаг сонин журмаар бид нар яваад байдаг. Тойрогт ажиллахаас гадна хуулийн төсөл бэлтгэх зардлууд ордог. Хуулийн төслийг бэлтгэхэд дандаа шинжээчийн зардлууд багтдаг. Цалингаас гадна тойрогт ажиллах, хуулийн төсөл боловсруулах, ном хэвлэл, сургалт сурталчилгааны гээд нийт 250 сая төгрөгийн төсөвтэй байдаг. Шатахууны зардлаас авахуулаад бүх зардлыг тайланд өгүүлдэг. Нууж хаагаад байх зүйл байдаггүй.

-Эрдэнэт үйлдвэр дээр 102 саяар сургалтын төлбөрөө төлүүлсэн хэрэг гарсан. Нэгэнт авчихсан мөнгийг буцааж төлүүлэх үү, буцаагаад төлчлөө гэхэд хариуцлага хүлээлгэх үү?

УИХ-ын гишүүн, МАН-ын бүлгийн дарга Д.Тогтохсүрэн:

-Эрдэнэт үйлдвэртэй холбоотой асуудлаар хариуцлага тооцох ёстой л гэж бодож байгаа. Засгийн газар хариуцлага тооцдог. Бүх л хүн хууль дүрмийн өмнө ижил байх ёстой. Засгийн газар ойрын хугацаанд хариуцлага тооцно гэж бодож байна.

gereg.mn

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ