• Тусгаар тогтнолын төлөөх бүх ард түмний санал асуулгын 75 жилийн ой тохиож байна

    Тиймээ би, бид, Монголчууд тусгаар тогтносон улсын иргэд ээ. Өнгөрсөн 20 дугаар зуун Монгол үндэстний хувьд тусгаар тогтнолын төлөөх зуун байсан.

    1911 оны Үндэсний эрх чөлөөний хөдөлгөөн, 1921 оны Ардын хувьсгал, 1924 оны Бүгд найрамдах улсаа тунхаглаж, Анхдугаар Үндсэн хуулиа баталсан, 1945 оны Тусгаар тогтнолын төлөөх бүх ард түмний санал асуулга, 1961 онд НҮБ-д элссэн, 1990 оны Ардчилсан хөдөлгөөн энэ бүгд түүний илэрхийлэл.

    1945 оны 10 дугаар сарын 20-ны өдрийн Тусгаар тогтнолын төлөөх санал асуулгын 75 жилийн ой тохиож байгаа энэ өдрийн мэндийг Монголчууддаа хүргэе.

    75 жилийн тэртээх энэ өдрийн 06-23 цагийн хооронд явагдсан санал хураалтад оролцвоос зохих 18-аас дээш насны хүмүүс 494074 хүнээс санал хураалтад 483291 иргэн оролцож 100 хувь Тусгаар тогтнолын төлөө саналаа өгсөн байна.

    Энэхүү өдрийг онцлохын учир нь Монгол улсын мөнхий хоёр хөршийн нэг Хятад улсаар Тусгаар тогтнолоо хүлээн зөвшөөрүүлэхийн тулд уг санал асуулгыг явуулсантай холбоотой.

    Тухайн үеийн Дундад иргэн /Хятад/ улс Монголын тусгаар тогтнолыг хүлээн зөвшөөрдөггүй байсан бөгөөд энэхүү санал асуулгын үр дүнд хүлээн зөвшөөрөхөөс аргагүйд хүрсэн түүхтэй юм.

    Хятадаас манай ард түмний санал асуулыг ажиглахаар мөн сарын 18-нд Дотоод явдлын яамны орлогч сайд Лэй Фажан-ы тэргүүлсэн 12 хүний бүрэлдэхүүнтэй албан ёсны төлөөлөгчид Улаанбаатарт хүрэлцэн ирсэн байдаг.

    БНМАУ-ын Тусгаар тогтнолын тухай Монголын ард түмний саналыг хураахаар байгуулагдсан төв комиссын дарга Г.Бумцэнд, орлогчоор Төв Хорооны ерөнхий нарийн бичгийн дарга Ю.Цэдэнбал, нарийн бичгийн дарга Ч.Сүрэнжав, нарийн бичгийн дарга Г.Дамба, Б.Ширэндэв нар томилогджээ.

    Ухуулга таниулгын хуудсыг Улаанбаатарт хэвлүүлж, орон нутагт тарааснаас гадна улс даяар 13 мянган удаа хурал цуглаан зохион байгуулж малчин, ард, ажилчин, сэхээтнүүдийг оролцуулжээ. Санал хураалтын төв комиссын дарга болон орлогч нар аймгуудыг хуваарилан авч, бэлтгэл ажлыг гардан зохион байгуулжээ.

    Улсын Бага хурлын дарга Г.Бумцэнд, Лэй Фажан-ыг аравдугаар сарын 22-ны 18.00 цагт хүлээн авч уулзан, санал хураалтын дүнг танилцуулав. Г.БумцэндМанай жинхэнэ санал хураах явдалд оролцвоос зохих 18-аас дээш насны хүмүүс 494074 хүн бөгөөд санал хураалтад 483291 иргэн оролцсон. Төв комиссын урьдчилсан дүн мэдээнээс үзэхэд аравдугаар сарын 20-ны өдөр нэгэн зэрэг санал хурааж, 21-22-нд төв комисст ирсэн урьдчилсан дүн мэдээгээр баримт болгон үзэхэд 483291  хүн саналаа өгсөн нь сонгуулийн эрхтэй нийт хүмүүсийн 97.8 хувь болсны дээр саналаа өгсөн иргэд 100 хувиар Монгол ард улсынхаа тусгаар тогтнолоо баталж саналаа өгсөн бөгөөд татгалзсан нэг ч хүн гарсангүй” гэжээ.

    Ийнхүү Монгол улс хоёр хөршөөрөө Тусгаар тогтнолоо хүлээн зөвшөөрүүлсэн билээ.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

      • Харин тийм ээ. түүхээ мэддэг болооч дээ хүмүүсээ. ухаант  буурлуудын буянд өнөөдөр туурга тусгаар улс  гэгдэж байна даа. 

    Холбоотой мэдээ