• “Уурхайчид ажил, амьдралын тэнцүү горим буюу 14/14 болгож хуульчлахыг шаардаж байна”

    2020-10-13

    МҮЭХ-ноос Хөдөлмөрийн тухай хуулийн шинэчлэлийн долоон асуудлаар УИХ-ын гишүүдэд шаардлага хүргүүлж буй талаараа мэдээллээ.

    МҮЭХ-ноос гэрээсээ хол удаан хугацаагаар хөдөлмөр эрхлэх асуудал уул уурхай, зам, барилгын салбарт хөдөлмөрийн хуулийн зохицуулалтгүйгээр ажиллаж байгааг хуулийн зохицуулалттай болгох тохиролцоог хийжээ. Гэвч хуулийн зохицуулалтыг оруулсан нь том алхам боловч ажиллах, амрах хоног дээр МҮЭХ санал нэгдэхгүй байгаа юм.

    Энэ талаар Монголын Эрчим хүч, геологи, уул уурхайн ҮЭ-ийн холбоон дарга Х.Буянжаргал “Жасаагаар ажиллах буюу уртын ээлжээр ажиллах талаар хуулийн төсөлд 20:10 гэж тусгагдсаныг МҮЭХ эрс эсэргүүцэж байна. Олон улсын Хөдөлмөрийн байгууллагаас гаргасан дүрмээр ажлын цагийг найм байна гэж тогтоосон.

    Монгол Улсад үйл ажиллагаа явуулж буй 300 гаруй уул уурхайн компаниудын 85 хувь нь 20:10-аар ажиллаж байгаа. 20:10-аар ажиллаж байгаа иргэдийн ар гэрийнх нь эсэргүүцээд байхад үүнийг хуульчилж, баталгаажуулах ямар хэрэгтэй юм бэ? Өнөөдрийн байгаа зүйлийг засч, ажил, амьдралын тэнцүү горим буюу 14:14 болгохыг шаардаж байна.

    Уурхайчид жилийн 365 хоногоос 94 хоногийг нь гэртээ, 24 хоногийг нь замд, 245 хоногийг уурхай дээр өнгөрөөдөг.

    Таван жилийн байдлаар Өмнөговь аймагт амиа хорлосон 76 тохиолдлын 13 нь гэр орноосоо хол байснаас болсон байна” хэмээн ярилаа.

    Хөдөлмөрийн хуулийн шинэчилсэн найруулгыг хэлэлцэх үед 14/14-ийн асуудлыг авч хэлэлцэхгүй бол Монголын Эрчим хүч, геологи, уул уурхайн ҮЭ-ийн холбооноос уурхайчдыг ажил хаялтад уриална гэв.

    Уул уурхайн салбар хамгийн эрэлттэй үед ажил хаялт хийвэл төсөв нэг өдөрт 8.1 тэрбум төгрөгийн алдагдал хүлээх юм.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ