• Т.Доржханд: Ерөнхийлөгч өө, улс төрийн намуудыг өөрийнхөө дүрмээр явуулна гэвэл үгүй шүү

    ХҮН-ынхан Сүхбаатарын талбайд тайван жагсаал хийж байна. Энэ үеэр тус намын дарга , удирдлагууд байр сууриа илэрхийллээ. 

    ХҮН-ын дарга Б.Найдалаа “Монгол Улсад шударга ёс, ардчилал байхгүй болсон байна. ХҮН-аас монголчууддаа хандаад,  Монголын Ардчилалд өнөөдөр онц байдал зарлаж байна.  Өнөөдөр бид ардчиллаа аварч, шударга ёсыг тогтоохгүй юм бол маргааш таны хүүхдийг хэн нэгэн улстөрчийн захиалгаар гавлах болно. ХҮН-ыг нийслэлийн сонгуульд оруулахгүй байхын тулд улс төрийн зохион байгуулалттай, санхүүжилттэй ажиллагааг явуулж байна. Өчигдөрхөн шуурхай журмаар, улс төрийн зорилгоо, шүүгчийн захирамж гаргаж, сонгуульд оролцох эрхийг түдгэлзүүлж.

    Энд онцолж хэлэхэд, ХҮН сонгууль оролцохтой холбоотой бүх бичиг баримтыг ном журмынх нь дагуу нягт нямбай бүрдүүлсэн.  Тэнд ямар ч асуудал байхгүй.  Түүнээс гадна, ХҮН-д дотоод хагарал, маргаан, тэмцэл огт байхгүй гэдгийг хариуцлагатайгаа, албан ёсоор мэдэгдэж байна. Энэ зөвхөн нэг намын асуудал биш шүү. Нийслэлийн сонгуульд оролцох, нэр дэвшиж байгаа хэдхэн хүний ч асуудал биш. Цаашид Монголд ардчилал байх уу, сонгууль явах уу, үгүй юу гэдэгтэй холбоотой асуудал. Тиймээс та бүхнийг гарч ирж, бидэнтэй нэгдэхийг урьж байна. Бид энэ асуудалтай тууштай, буцалтгүйгээр тэмцэх болно” гэлээ.

    Харин УИХ-ын гишүүн Т.Доржханд “Монгол Улсад ардчилал яаж тогтох юм бэ. Аливаа улсад ардчиллыг хамгаалдаг зүйл нь ардчилсан сонгууль байдаг. Монгол Улсын Үндсэн хуульд хүн бүр сонгох, сонгогдох эрхтэй гэж заасан байдаг. Гэтэл нэг захиалга биелүүлдэг шүүгчийн шийдвэрээр Монголын иргэдийн сонгох, сонгогдох эрхийг уландаа гишгэчихдэг үе иржээ.  Энэ хэсэг залуучууд, нам сонгуульд оролцох, оролцохгүй байх эсэх асуудал биш болчихож.  Парламентын сонгууль гэхээр л жинхэнэ сонгууль байдаг. Орон нутгийнх болохоор дагавар хүүхэд шиг, хэн ч тоодоггүй байж болохгүй. Шат шатны сонгууль ном журмынхаа дагуу л явах ёстой.

    Хэрвээ энэ удаад ямар нэг байдлаар сонгуульд биднийг оролцуулахгүй бол 2021 оны сонгууль ч гэж байхгүй шүү. Ерөнхийлөгчийн сонгууль гэж байхгүй. Дахиад сонголтгүй сонгуулийг хийх гэж зүтгэж байна. Хэн нэгэн дарга, эрх мэдэлтнийг суудалд үлдээх арга нь ХҮН биш ээ. Бид хэн нэгний цүнхийг барьж үзээгүй. Хэн нэг даргын хэрэгсэл ч биш. Тийм болохоор бид хэн нэгэнтэй хүчээр нэгдэж, сонгуульд оролцох шаардлагагүй. Үүнийг албан ёсоор хэлье.  Хэрвээ бидэнтэй нэгдэж сонгуульд оролцохгүй бол хуулийнхаа хайчинд оруулаад, яаж ч чадна гэдэг мессежийг тов тодорхой өглөө гэж харж байна.  Бидний шаардлагыг 24 цагийн дотор биелүүл. Биелүүлэхгүй бол тэмцлийн хурц хэлбэрт шилжинэ.

    АН бидэнд нэгдэж сонгуульд оролцох хүсэлт тавьсан.  Манай нам зөвшөөрөөгүй. Тиймдээ ч тэд яаж ийж байгаад ялалт байгуулахын төлөө улайрч байна гэж харж байгаа.  Бид хэн нэгэнтэй нэгдэхгүй ээ. Ашиг хонжоо олохын төлөө ч нам байгуулаагүй. Хуулийн байгууллага хэн нэгний хараат байдлаар бусдад үйлчилдэг юм бол бид түүнийг өөрчлөх болно. Хуулийн төслийг нь санаачлаад оруулахаар бэлтгэж байна. Шуудхан хэлэхэд, энэ бүхний ард АН, Ерөнхийлөгч Х.Баттулга байна гэж хардаж байгаа. Шууд хэлье, Х.Баттулга Ерөнхийлөгч өө, улс төрийн намуудыг өөрийнхөө дүрмээр явуулна гэвэл үгүй шүү. АН, МАН байна уу, Ерөнхийлөгч нь үү, Ерөнхийлөгчид горилогч нь хамаагүй, бид хэний ч хамааралгүйгээр шийдвэрээ гаргаад явах болно” гэсэн юм.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    • ХҮН намыг сонгуульд оролцох эрхийг нээж өгөөчээ. Иргэд бид Сонгох сонгогдох эрхээ эдэлмээр байна. Сонголтгүй сонгуулийг тулган шаардаж, улс төрийн хүчирхийлэл үйлдэхээ болиочээ. Хууль сахиулах байгууллагууд өдөрт нь өргөдөл гомдол нэхэмжлэл аваад өдөрт нь шийддэг тийм хурдан болчихоо юу? гайхаж байна. Намын тамга тэмдэг хуурамчаар үйлдэж, ашигласан гэх гэмт хэргийн шинжтэй мэдээллийг цагдаагийн байгууллагад гаргаж өгөөд хагас сар болоход огт ажиллагаа хийгээгүй. Хариуцаж авсан мөрдөгч нь нэг бол өвдөөд нэг бол амраад нэг бол ажлаа хийхгүй утасаа авахгүй гэх мэт удаашрал үүсгэж байсан. Гэтэл нэг өдрийн дотор тэр тусмаа сонгуулийн сурталчилгаа эхлэх өдрийн өмнөх өдөр буюу маш чухал өдөр шүүхээс захирамж гараад намын нэр дэвшигч нарын сонгогдох эрхийг түдгэлзүүлж байна гэдэг аймшигтай. Шүүх эрх мэдэл бүгдэд эрх тэгш үйлчлэх зарчимтай. Энийг улс төрийн хүчирхийлэл гэхээс өөр юу гэхэвдээ. Хүчирхийлүүлж байгаа ямар ч этгээд зөрчигдсөн эрхээ сэргээлгэхээр гомдол хүсэлт гаргаж шийдвэрлүүлэх эрхтэй. Шүүхэд болон бусад хууль сахиулах байгууллагад хандах нь зүйн хэрэг гэж бодож байна.

    • МАН, АН хоёр хор найруулахаа болиочээ. Тэр тусам нь 3дагч хүчнийг дэмжинэ дээ. Шал дургуй хүрч байна.

    • Энэ хүртэл чинь та нарыг дэмжиж ирсэн шүү. Одоо л үнэн нүүр царай чинь харагдлаа. Та нар орон нутгийн сонгуулийн хуулиа мэдэхгүй байна гэж байхгүй? Яах гэж өөрсдөө хуулиа зөрчсийн? Яах гэж заавал маргаантай ХҮН нам гэж нэрийг авч 2020 оны 8 сард бүртгүүлсэн юм??? Хуулиа унш!!!! МАН ы даалгавраа сайн биелүүлж байгаа юм байна 

    Холбоотой мэдээ