АН шинэ гишүүн О.Баасанхүү,С.Жавхлан,Г.Уянга,С.Баярцогт нараа нэр дэвшүүлбэл намынхаа дүрмийг зөрчинө

Самбаа Г

2020-05-14

Сонгууль дөхөөд улстөр сонирхолтой өргөж байна. Намууд УИХ-ын энэ удаагийн сонгуульд нэр дэвшигчдээ тодруулж буй энэ өдрүүдэд АН шинэ гишүүдээр бүл нэмсээр байна.

Хэд хоногийн өмнө 2016 онд МАХН-аас УИХ-д нэр дэвшин сонгогдсон О.Баасанхүү АН-д элссэн. Тэгвэл УИХ-ын энэ удаагийн сонгуульд бие даан өрсөлдөнө гэдгээ илэрхийлж аудитын газарт мөрийн хөтөлбөрөө хүргүүлсэн УИХ-ын гишүүн С.Жавхлан, Ерөнхийлөгчийн зөвлөх Г.Уянга нар өнөөдөр АН-ын гишүүнээр элслээ.

Мөн С.Баярцогт ч гишүүнчлэлээ сэргээж байгаа сурагтай.

О.Баасанхүүгийн тухайд анх Н.Энхбаярын “оймс”-нд хавчуулагдаж УИХ-д орж ирсэн гэгддэг ба МАХН-ыг Н.Энхбаяраас булааж авах гээд чадаагүй юм. Харин одоо АН-д оров.

МУГЖ дуучин С.Жавхлан өмнөх сонгуулиар УИХ-д бие даан сонгогдсон. Ганцаардахын туйлд хүрсэн С.Жавхлан энэ хооронд Ж.Батзандангийн Шинэ намд тулгын гурван чулууны нэг болж элсээд буцсан. Харин энэ удаа АН-д элслээ.

Ерөнхийлөгчийн зөвлөх Г.Уянга гудамжны улстөрөөс АТН-ын дэд дарга, ҮШН-ын ЕНБДарга, ТТЭНН-ын дарга, УИХ-ын гишүүнээр тус тус ажиллаж байсан нэгэн. Энэ удаа АН-аас нэр дэвшье гэтэл С.Эрдэнэ үгүй гэсэн хариулт өгсөн билээ. Гэвч энэ удаа тэр АН-д элсэж байгаа түүнийг УИХ-д нэр дэвшүүлэх гэж байгаа хэрэг бололтой.

С.Баярцогтын тухайд АН сонгуульд амжилт олсон, олоогүй бүхий л албан тушаалыг хашиж ирсэн. Оюутолгойн луйврын гэрээг үзэглэсэн тэрбээр оффшорт олон сая ам.доллар нуусан гэдэг. АТГ түүнийг гурав, дөрвөн жил шалгасан ч нэр дэвших эрхтэй гэнэ.

Ийнхүү бие даах гэж байсан нөхдүүд АН-д элслээ. Харин тэднийг тус нам нэр дэвшүүлэх болов уу.

Учир нь АН-ын Үндсэн дүрмийн “Гишүүний эрх” хэмээх 3.6 бүлгийн 3.6.1.3.-д “Намын дотоод болон намаас төрийн сонгуульд нэр дэвшигч нь 6 сарын өмнө намд элссэн байна” гэж заасан байдаг.