М.Энхсайханы хэргийн урьдчилсан хэлэлцүүлэг өнөөдөр болно

Нийслэлийн прокурорын газраас Ерөнхий сайд асан М.Энхсайханд яллах дүгнэлт үйлдэн, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд ирүүлсэн. Өнөөдөр 15:00 цагт түүнд холбогдох хэргийн урьдчилсан хэлэлцүүлгийн шүүх хурал болж, шүүх хуралдааны товыг тогтооно.

М.Энхсайханд Эрүүгийн хуулийн тусгай ангийн 19.6 дугаар зүйлийн нэг, мөн хуулийн тусгай ангийн 22.1 дүгээр зүйлийн нэг, хоёр дахь хэсэгт зааснаар яллах дүгнэлт үйлджээ. Түүнийг хорлон сүйтгэх үйл ажиллагаа явуулахыг завдсан гэж буруутгаж байна.

М.Энхсайханыг Швед Улсад суух Элчин сайдаар томилогдон ажиллах үед нь Ерөнхийлөгчийн саналын дагуу эгүүлэн татсан. Энэ тухай Ерөнхийлөгчийн гадаад бодлогын зөвлөх Г.Тэгшжаргал “Шведийн Вант Улсад суугаа Элчин сайд М.Энхсайхан сонгууль болон түүний дараагаар улс төржсөн мэдэгдэл гаргасан нь эгүүлэн татах үндэслэл болсон” хэмээсэн.

Дээрх зүйл ангиар 8-15 жил хүртэл хугацаагаар хорих ял оноодог байна.

 

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ