76:1/Морьтой ирсэн С.Жавхлангийн дээлтэй суусан дөрвөн жил

2016.07.01

Би дээлээ тайлахгүй, ер нь эднийг бүгдийг нь дээл өмсгөж сургана

УИХ-ын гишүүний түр үнэмлэхээ авах үеэр тэрээр  “Би дээлээ тайлахгүй, ер нь эднийг бүгдийг нь дээл өмсгөж сургана.Эд нарт би жинхэнэ ядаргаа болно. Монгол хувцастайгаа ирэхгүй бол цаашлаад монгол дээлээ өмсөхгүй бол Жавхлан тэмцэнэ шүү” гэсэн билээ.

2016.07.05

Ташуураа далайн Төрийн ордонд орж ирэв

Бие даан өрсөлдөж сонгогдсон С.Жавхлан чуулганы нээлтэд  99 морьтон дагуулан  ирж, Ташуураа далайн Төрийн ордонд орж ирэв.

2016.09.02

Анхны цалингаараа бага ангийн сурагчдад дүрэмт хувцас урлуулан өгөв

БЗД-ийн 85-р сургуулийн нэг ангийн сурагчдад дүрэмт хувцасыг нь өөрийн анхны цалингаараа хийлгэн, бэлэг барив. Сурагчдын дүрэмт хувцасыг монгол дээлний загвараар урлуулжээ. Түүний анхны цалин хэмээн нэрлэж буй нь учиртай аж. Өмнө нь С.Жавхлан төрийн алба хашиж байгаагүй бөгөөд цалин авч байгаагүй гэнэ шүү. Нийтдээ 1.542.122 төгрөгийн цалин авсан байна.

2016.11.11

“Эрдэнэт” үйлдвэрийн асуудлаар нээлттэй ярилцах урилгыг хүргүүлэв

“Эрдэнэт” үйлдвэрийн асуудлаар нээлттэй ярилцах урилгыг Ерөнхийлөгч, УИХ-ын дарга, Ерөнхий сайд, Монголбанкны ерөнхийлөгч асан Н.Золжаргал нарт хүргүүлэв.

2017.01.11

  Ерөнхийлөгч Ц.Элбэгдоржийг огцрохыг шаардав

Тусгаар тогтнол, эв нэгдлийн намын дарга Г.Уянгатай хамтран  Ерөнхийлөгч Ц.Элбэгдоржийг огцруулах асуудлаар хэвлэлийн бага хурал хийв.

2017.04.05

Чуулган эхэлсэн өдөр Бурхан халдуныг зорив

Чуулганы нээлтэд оролцохгүй гэдгээ илэрхийлжээ. Ханш  нээгдсэн өдөр Төрийн ордонд биш,  уул, ус, овоондоо очиж, монгол төр, ард иргэдээ даатгах цаг  ирсэн гэж мэдэрсэн учраас  Бурхан халдуныг зорьжээ.

2017.05.18

Намайг энд хүн гэж тоохгүй байна

Хурлын ирцийн мэдээгээр байнга сүүл мушгидаг тэрээр  “Би олон хүний саналаар төрөө цэвэрлэхээр энд суусан. Гэтэл үнэхээр намайг хүн гэж тоохгүй байна. Ийм худлаа зүйлийг өдөр бүр хэлэлцэж байгаа төрд байх нь зөв ч юм уу, үгүй ч юм уу” гэв.

2017.05.31

Миний шаардлагад хариу өгөхгүй байгаа учраас би өрөөндөө амьдарна

БСШУС-ын сайд Ж.Батсуурийг огцруулах асуудлыг хэлэлцэх үеэр “Намайг ажлаа хийдэггүй гэж шүүмжлээд байна. Би шаардлага өгсөн ч хариу өгөхгүй байна.Тиймээс өрөөндөө амьдарна” гэв. Оффшор данстай холбоотой  шаардлагуудыг УИХ-ын дарга, Ерөнхийлөгчид хүргүүлсэн ч хариу өгөөгүй учир тэр ийнхүү ажлынхаа өрөөнд хэд хонов. 

2017.09.18

МАН-ын хэрүүлээс болж Монгол хохирч дууслаа

 “МАН-ын хэрүүлээс болж Монгол хохирч дууслаа” гээд 10 хоногийн дотор засгаа эмхлэн байгуулахыг эрх баригчдад  шаардав.

2018.01.10

“УИХ уу, Улсын их задрал уу” нээлттэй хэлэлцүүлгийг Төрийн ордонд зохион байгуулахыг санаачлав

Тэрээр  “УИХ уу, Улсын их задрал уу” нээлттэй хэлэлцүүлгийг Төрийн ордонд зохион байгуулахаар санаачилсан ч УИХ-ын Тамгын газраас танхимын боломжгүй гэсэн хариу өгчээ.

2018.06.28

60 тэрбумтай холбогдсон хүмүүсийг Төрийн ордноос хөөтөл тэмцэнэ гэв

Ерөнхийлөгч Х.Баттулгад офшортой тэмцэх, 60 тэрбумын асуудлыг шийдэхээр гарч ирсэн амлалтыг нь сануулж, энэ хүмүүсийг  Төрийн ордноос хөөж гартал тэмцэл өрнүүлнэ гэв.

2018.08.30

Сү.Батболдыг АТГ-д шалгуулахаар хүсэлт өгөв

УИХ-ын гишүүн Сү.Батболдыг Авлигатай тэмцэх газар шалгуулах хүсэлт өгч байгаагаа цахим хуудсаараа мэдэгдлээ. Сү.Батболд гишүүнтэй хамаарал  олон компанийг шалгах, яаж ийм олон компанитай болсноо тайлбарлахыг шаардав.

2018.10.04

Энд тэндхийн төмөр өргөдөг Ерөнхийлөгчтэй боллоо

"Гадаадын онгоц ирж,  Монголд баривчилгаа хийсэн, галт тэрэг замаас унаж, осолдсон, яам, тамгын газарт хүн амины хэрэг  гарсан байхад ҮАБЗ хуралдахгүй байна, хэлээ хазаад сууж байгаа Ерөнхий сайд, энд тэндхийн төмөр өргөдөг Ерөнхийлөгчтэй боллоо” хэмээн шүүмжлэв.

2019.04.05

 Гишүүний шинэ тангараг зохиов

УИХ-ын гишүүдэд зориулж амин хувь, авгай хүүхдийнхээ төлөө ажиллана гэсэн шинэ тангараг зохиосноо уншиж өгөв.

2019.04.22

Гишүүн болсноос хойш анх удаа бие даан хууль боловсруулав

УИХ-ын гишүүн болсноос хойш анх удаа  бие даан хууль боловсруулав. УИХ-ын тухай хуульд Сонгуульд нэр дэвшиж байгаа хүн офшор бүс, архи  тамхины үйлдвэрлэлтэй хамаагүй байх, үндэслэлгүйгээр хөрөнгөжөөгүй, хахууль аваагүй, ял шийтгүүлээгүй байх заалтыг тусгажээ. Энэ хуулийн төсөл одоогийн УИХ-ын гишүүдэд ч хамаатай гэв.

2019.05.02

Тулгын гурван чулууны нэг нь болов

УИХ-ын гишүүн Л.Болд, Ж.Батзандан нарын ШИНЭ намд элсч байгаагаа мэдэгдэж, тулгын 3 чулуу шиг туждаа хамт явна гэв.

2019.06.17

Гэмт хэрэгт холбогдсон гишүүдийн бүрэн эрхийг түтгэлзүүлдэг хуулийн төслийг санаачлав

УИХ-ын гишүүд олноор ЖДҮ-гээс зээл авсан учир гэмт  хэрэгт холбогдсон гишүүдийн бүрэн эрхийг түдгэлзүүлэх асуудлыг түргэн шуурхай хэлэлцдэг байх хуулийн төсөл санаачилж, УИХ-ын дарга Г.Занданшатарт өргөн барив.

2020.02.10

ШИНЭ намын үзэл баримтлалтай танилцаж буй

ШИНЭ намыг дэмжиж гурав, дөрвөн аймгаар явсан. Надад ШИНЭ нам санал тавьж, үзэл баримтлалаа явуулсан. Үзэл баримтлалтай нь танилцаж байгаа.

2020.04.01

УИХ-ын гишүүн С.Жавхлан өөрийн фэйсбүүктээ "30 жил Монгол эх орныг минь, тонон дээрэмдэж, эв эе, элбэрэл журмыг алдуулж, зөвхөн хар амь, ялзарсан толгойгоо хоохойлсон сэтгэл нь өмхий адсаганууд, Таануудад 31-дэх жил гэж байхгүй шүү, тийм орон зай одоо огт үгүй болсоныг дуулгаад, шоолж инээе дээ...” хэмээн постолжээ.