• Дэлхийн анхны сансарын нисгэгч Ю.Гагарины гэргий таалал төгсжээ

    Хүн төрөлхтний түүхэнд анх удаа сансарт ниссэн Юрий Гагарины гэргий Валентина Ивановна Гагарина энэ мягмар гаригт 85 настайдаа таалал төгсжээ. Энэ талаар ТАСС мэдээлсэн байна. ОХУ-ын сансрын судалгааны байгууллага болох Роскосмос эмгэнэл илэрхийлжээ.

    Валентина Ивановна Гагарина 1935 оны арванхоёрдугаар сард Оренбургт ажилчны гэр бүлд төрсөн, 1958 онд Оренбургийн эмнэлгийн дунд сургуулийг дүүргэжээ. 1960 оноос эхлэн 1990 онд гавьяаныхаа амралтад гарах хүртлээ Москвагийн ойролцоох нислэгийн удирдлагын газрын эрүүл мэндийн төвд ажиллажээ.

    Нөхөртэйгөө оюутан ахуй цагтаа танилцаж, 1957 онд гэрбүл болж, хоёр охинтой болжээ. 1968 онд нөхрөө нас барснаас хойш зөвхөн дэлхийн анхны сансрын нисгэгчтэй холбоотой олон нийтийн арга хэмжээнд оролцохоос бусдаар хэвлэлд ярилцлага өгөхөөс татгалзаж, нам гүм амьдрах болсон аж.

    Харин 1986 онд Валентина Ивановна Гагарина дурсамжийн номоо  гаргажээ. Тэрээр амьдралынхаа сүүлийн жилүүдэд Москвагийн ойролцоо Оддын хотхонд амьдарчээ.

    Тэдний том охин Елена 1959 онд төрсөн бөгөөд одоо “Москвагийн Кремль” музейн захирлаар ажилладаг бол 1961 онд төрсөн бага охин Галина нь Г.В.Плехановын нэрэмжит Оросын эдийн засгийн их сургуульд тэнхимийн эрхлэгчээр ажилладаг байна.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ