Ерөнхийлөгч асан Ц.Элбэгдоржийг шалгаж байна, дуудлаа, ирсэнгүй, зугатаад явчихлаа, олдохгүй байна, хайж байна, байж л байна гэх мэт мэдээллүүд хөвөрсөөр яг бүтэн жил болжээ.
Гэтэл саяхан түүнийг шалгаж байгаа ч тэрбээр хил давж явчихаад ирэхгүй байгаа учир интерполоор хайж байгаа хэмээн АТГ-ын түшмэл мэдэгдэв. Хариуд нь тэрбээр удахгүй очно гэж урьдын адил твийтэрээрээ мэдэгдэв. Түүнийг Тавантолгойн уурхайг МСS болон Хятадын Шинхуад өгөх гэсэн, “Эрдэнэт”-ийн 49 хувийг ХХБ авсан болон уран зургийн хэрэг, Монголбанкны Эрдэнэсийн сангийн асуудал, АСЕМ зохион байгуулсантай холбоотой хэрэг гээд олон хэргээр шалгах ёстой гэдэг ч одоо л дөнгөж шалгаж эхэлж байгаа ажээ.
Ингээд Ц.Элбэгдоржийн гэх хэрэг явдалтай холбоотой бүтэн жилийн дуулианаас ЦАГЛАБАР хэлбэрээр түүвэрлэн хүргэж байна. Бүтэн жилийн турш “Элбэгдорж, Элбэгдорж, Элбэгдорж…” хэмэсэн хүмүүсийн зарим нь түүний нэрээр рейтэнгээ өсгөхийг хүссэн нь ч бас үнэн.
2019
16 January
178 хуудас баримт
2019.01.16
Монгол Улсын Ерөнхийлөгч Х.Баттулга Улсын Ерөнхий Прокурорын газрын удирдлагуудтай уулзаж, Ерөнхийлөгч асан Ц.Элбэгдоржийг 2015 онд Тавантолгойг 100 жилээр гадныханд өгөх ажиллагааг зохион байгуулсан учир шалгаж өгнө үү хэмээн 178 хуудас баримтыг гардуулж өгсөн.Гэвч уг хүсэлт хаана очоод гацсаныг хэн ч үл мэднэ, өнөө хэр таг чиг.
13 February
Ц.Элбэгдорж:Х.Баттулга архаг хулгайчийн зангаа гаргаж байна
2019.02.13
Монгол Улсын Ерөнхийлөгч асан Ц.Элбэгдорж нэр бүхий сэтгүүлчидтэй "Туушин" зочид буудлын хурлын танхимд ярилцахдаа
“Х.Баттулга архаг хулгайчийн зангаа гаргаж байна.Би хулгайчдыг үнэрээр нь танина. Өөрийнхөө бүх хулгайг надад тохох гэж байна. Өөрөө хулгай хийчихээд хамтрагч татдаг аргатай хүн. Х.Баттулгатай итгэл үнэмшлээрээ ажиллах хүн олдохгүй. Х.Баттулгад хүний нөөц байхгүй. Х.Баттулгад хулгайчийн нөөц л байгаа”
гэхчилэн ярьсан билээ. Х.Баттулгын нэрийг 79 удаа давтсан уг ярилцлага экс Ерөнхийлөгчийн нэр холбогддог МАНАН бүлэглэлийн хамгийн том луйвар гэгдэх “Эрдэнэт”-ийн 49 хувийн асуудал илрэх гэж буйтай холбоотой бололтой гэж хардсан нь бий.
18 February
Ц.Элбэгдоржийн Тороолын тухай нийтлэл
2019.02.18
Ц.Элбэгдорж Тороолын тухай нэгэн нийтлэл бичиж өөрийн талын хэвлэлд нийтлүүлэв. Түүндээ “Нэгийг нь нөгөөгөөр үзэн ядуулах нь Монгол төрийн ажил биш” гэж өгүүлсэн билээ. Уг нийтлэлээ тэрээр Ерөнхийлөгч Х.Баттулгад зориулсан нь ойлгомжой.
22 February
Хууль дуудсан цагт..
2019.02.22
Монгол Улсын Ерөнхийлөгч асан Ц.Элбэгдоржийг Тавантолгойн асуудлаар байцаахаар АТГ-аас дуудсан. Тэрбээр Ерөнхийлөгч байхдаа хэлж байснаараа хууль дуудсан цагт “зангиагаа зүүгээд, гутлаа тослоод гарлаа” хэмээн жиргэсэн юм.
25 February
Ц.Элбэгдоржийн үед гаргасан ҮАБЗ-ийн зөвлөмжийг хүчингүй болгов
2019.02.25
Ерөнхийлөгч асан Ц.Элбэгдоржийн үед ҮАБЗ-өөс гаргасан Монгол Улс төвийг сахих зөвлөмжийг ҮАБЗ хүчингүй болгосон. Ерөнхийлөгч асан Ц.Элбэгдорж өөрийнх нь санаачлагыг үгүйсгэснийг буруушааж, өөрийн нүүр номоор байр сууриа илэрхийлжээ.
20 March
Ц.Элбэгдоржийн ажлаас 30 гаруй уран зургийг хураав
2019.03.20
ЭЦА-аас Ц.Элбэгдоржийн ажлын өрөөнд нэгжлэг хийж, 1000 гаруй уран зураг дундаас 30 гаруй зургийг хураасан юм. Тэдгээр дэлхийн болон Монголын үнэт уран зургууд хаачсаныг хэн ч эргэж мэдээлээгүй байна.
26 March
Н.Алтанхуяг Ц.Элбэгдоржийг шүүхэд өгөв
2019.03.26
Ерөнхий сайд асан Н.Алтанхуяг Ерөнхийлөгч асан Ц.Элбэгдоржийг шүүхэд өгчээ. Н.Алтанхуяг цахим хуудсандаа “Шинэчлэлийн Засгийн газраа огцруулаад өгөөч гэж өргөдөл өгсөн мэтээр намайг гүтгэсэн Ц.Элбэгдоржийг шүүхэд өглөө. Түүний мэддэг тооны нэгж нь тэрбум учраас 1 тэрбум төгрөг нэхэмжиллээ” гэсэн юм.
27 March
“Шударга бусын хонгилд хэлмэгдэгчдийн холбоо” ТББ байгуулагдав
2019.03.27
Ерөнхий сайд Н.Алтанхуягийн зөвлөх асан Лүймэдийн Гансүх “Шударга бусын хонгилд хэлмэгдэгчдийн холбоо” ТББ байгуулж буйгаа зарласан. Тэрээр Ц.Элбэгдорж, Б.Хурц нарын байгуулсан шударга бусын хонгилд хэлмэгдсэн хүмүүстэй нийлж тэмцэхээ илэрхийлсэн ч түүнээс хойш таг чиг.
30 April
Монгол Улсын Эрдэнэсийн санг хохироосон нь
2019.04.30
УИХ-ын нэгдсэн хуралдаанаар Монгол Улсын Эрдэнэсийн сангийн 2018 оны төсвийн гүйцэтгэл, үндсэн орлого, гүйлгээ, зарлагын 2019 оны төсвийн тухай тогтоолын төслийг хаалттай хэлэлцэх үед УИХ-ын гишүүн Т.Аюурсайхан “Ерөнхийлөгч асан Ц.Элбэгдорж хүртэл Эрдэнэсийн сангийн захирал бэртэйгээ нийлээд тус санг хохироосон талаар ажлын хэсгийн дүгнэлт бий. Хохирлын хэмжээ нь ч тодорхой. Гэвч “нууц” гээд дэлгэж болдоггүй” гэж хэлсэн.Гэвч уг хэргийн үнэн,худал мөн л тодорхойгүй. Ц.Элбэгдоржийн бэр гэгдсэн Монголбанкны Эрдэнэсийн сангийн захирал П.Эрдэнэтуяа өнөө хэр ажлаа хийсээр яваа.
01 May
Алтанхуягийг унагасан гэх хуульгүй хэрэг
2019.05.01
Ерөнхийлөгч Х.Баттулгын улс төрийн бодлогын зөвлөх асан Н.Алтанхуяг "2016 онд АН-ын даргын сунгаанд нэр дэвшмэгц АТГ намайг дуудан, сэжигтнээр татсан. Намын даргын санал хураалтаас гурав хоногийн өмнө яллагдагчаар татчихсан. Намайг Ерөнхийлөгчийн сунгаанд унагаах ажлыг Ц.Элбэгдорж зохион байгуулж, унагасан” хэмээн мэдэгдсэн. Хуультай хэргүүд нь шийдэгдэхгүй байхад Алтанхуягийг унагасан гэх хуульгүй хэрэг ч яамай.Харин Н.Алтанхуяг Эбэ-г муулж нэр хүнд олж чадаж байна уу,үгүй юу гэдэг эргэлзээтэй.
26 June
“Эрдэнэт”-ийн 49 хувийн асуудлыг Ц.Элбэгдорж мэдэж байсан
2019.06.26
Ерөнхийлөгчийн Тамгын газрын дарга З.Энхболд “Эрдэнэт”-ийн 49 хувийн асуудлаар АТГ-т очиж мэдүүлэг өгсөн. Тэрээр “АТГ-д ирж гэрчийн мэдүүлэг өглөө. Ч.Сайханбилэг Ерөнхий сайд байхдаа “Эрдэнэт”-ийн 49 хувийг авахдаа тухайн үеийн УИХ-ын дарга намайг, тухайн үеийн Ерөнхийлөгч Ц.Элбэгдоржийг мэдэж байсан гэдэг ийм мэдүүлэг өгсөн юм байна. Энэ газраас бас Ерөнхийлөгч асан Ц.Элбэгдоржийг хүрч ир гээд байгаа юм байна. Ирж мэдүүлгээ өгөөрэй, над шиг” гэж хэлжээ.
10 September
Шүүхээс 1 сая төгрөгийн торгууль ногдуулав
2019.09.10
АН-ын дарга, Ерөнхий сайд асан Н.Алтанхуягийг гүтгэсэн хэргээр Ерөнхийлөгч асан Ц.Элбэгдоржид шүүхээс нэг сая төгрөгийн торгууль ногдуулжээ. Нийслэлийн Сүхбаатар дүүргийн Эрүүгийн хэргийн анхан шатны шүүх “Монгол Улсын Ерөнхий сайд Н.Алтанхуяг нь өөрийнхөө Засгийн газрыг унагахаар санал гаргасан” гэх мэдээллийг хэвлэл мэдээллийн хэрэгслээр дамжуулан түгээснээрээ Н.Алтанхуягийг гүтгэсэн гэж үзжээ.
30 October
АН-ын шинэчлэх хөдөлгөөний П.Галиндэв мэдэгдэл хийв
2019.10.30
АН-ын шинэчлэх хөдөлгөөний П.Галиндэв “1996-2000 онд С.Эрдэнэ БГД-ийн Засаг даргаар ажиллаж байхдаа БГД-ийн ихэнх газруудыг хувьдаа авчихсан, 2004-2008 онд НДЕГ-ын даргаар ажиллаж байхдаа хууль бусаар хувьдаа мөнгө завшсан хэргээр шалгагдаж, хоригдож байсан ч Ц.Элбэгдорж хэргийг нь хэрэгсэхгүй болгож сулласан. Тэгэхээр С.Эрдэнэ бол Ц.Элбэгдоржийн барьцааны хүн юм” гэж мэдэгдэв.
01 November
Ц.Элбэгдоржийн найзуудыг АТГ-ын шалгаж, ажиллагаа явуулсан ч..
2019.11.01
Ц.Элбэгдоржийг Ерөнхийлөгчөөр ажиллаж байх үед нь “Эрдэнэт” үйлдвэрийн захирлаар ажиллаж байсан Ц.Даваацэрэн болон Ц.Элбэгдоржийн найз Б.Отгонбаатар нарыг АТГ-ын Мөрдөн шалгах хэлтсээс хойшлуулшгүй ажиллагаа явуулж, гэр, ажлын байранд нь нэгжлэг хийгээд цагдан хорьжээ. Энэ хэрэг өнөө хэр бас л шийдэгдээгүй.
07 November
Өмгөөлөгч К.Манлай 3 сая ам.долларын баримтуудыг дэлгэв
2019.11.07
Ерөнхийлөгч асан Ц.Элбэгдорж, ЕТГ-ын дарга асан П.Цагаан, Монгол Улсаас БНСУ-д Элчин сайдын үүрэг гүйцэтгэгч асан Ж.Сүхээ нарын төрийн өндөр албан тушаалтнууд БНСУ-ын иргэнийг залилан мэхлэх замаар 3 сая ам.доллар авч, мөн сонгуулийн сурталчилгаандаа 700.000$ -ын хандив нэхэж авсан ноцтой баримтыг өмгөөлөгч К.Манлай дэлгэв.
18 November
Ц.Элбэгдорж:Би зугтаад хаачих вэ..
2019.11.18
Ерөнхийлөгч асан Ц.Элбэгдорж өөрийн нүүр номоор “Олон улсын байгууллагуудад хүлээсэн үүргийнхээ дагуу хурал цуглаан, зөвлөгөөнд оролцоод явж байна. Энэ хооронд хуулийн байгууллагаас надаас асууж тодруулах зүйл гарсан юм шиг байна. Зарим нь намайг оргож зугатсан юм шиг сэтгэгдэл төрүүлэх гэж оролдож байна. Би зугатаад хаачих вэ, төрийн хамгаалалт нь дагаад явж байгаа.Ойрын хоногуудад хөтөлбөрт тусгачихсан үйл ажиллагаандаа оролцоод Монголдоо заавал очно” гэжээ.
27 December
АТГ-ээс гурван ч удаа дуудсан ч нэгэнд ч очсонгүй
2019.12.27
Монгол Улсын дөрөв дэх Ерөнхийлөгч Ц.Элбэгдоржоос эрүүгийн нэг бус хэрэгт холбогдуулан гэрчийн мэдүүлэг авахаар дуудсан ч АТГ-т очихгүй байна. Түүнийг гурван ч удаа дуудаж тайлбар авахаар хандсан ч тэрбээр нэгэнд ч очилгүй хилийн чанадад явж байгаа гэх мэдээлэл цацагдав.
2020
30 January
TDB Capital болон Mongolian Copper Corporation-тай холбоотойгоор мөрдөн шалгах ажиллагааг эхлүүлэв
2020.01.30
Нийслэлийн прокурорын газраас Ц.Элбэгдоржийг Ерөнхийлөгчөөр ажиллаж байхдаа Монгол Улсын Ерөнхийлөгчийн тухай хууль болон бусад хуулийг зөрчиж Худалдаа хөгжлийн банк, түүний охин компани болох TDB Capital болон Mongolian Copper Corporation-д давуу байдал олгосон гэх үйлдэлд нь яллагдагчаар татаж, мөрдөн шалгах ажиллагаа явуулж эхлэв.
03 February
Ц.Элбэгдоржийг эрэн сурвалжлуулахаар Интерполд хандав
2020.02.03
АТГ-аас Монгол Улсын Ерөнхийлөгч асан Ц.Элбэгдоржийг эрэн сурвалжлуулахаар Интерполд хандсан талаарх мэдээлэл цацагдсан. Энэ сарын 3-ны өдөр Монгол Улсын Интерполын Үндэсний төв товчоонд Ц.Элбэгдоржийн талаар мэдээлэл авах, байгаа газрыг нь тогтоолгохоор хөх буланд зар байршуулах хүсэлтийг гаргасан гэдгээ АТГ мэдээлсэн.
15 February
Би удахгүй очно
2020.02.15
Ц.Элбэгдорж өөрийн твиттер хуудаснаа “Жиргээ хараагүй хэд хонож. Бөх барилдахгүй, сэтгүүлчдийг дуудаж байцаасан, намайг хайж байгаа гэнэ. Би хуулийн байгууллагад хаана, ямар ажилтай яваа мэдээллээ өгсөн юмсан. Намайг хайх хэрэггүй. Би удахгүй очно. Байршил тогтооход заавал Интерполоор яах нь вэ, дижитал ертөнц шүү дээ” хэмээн мэдэгдсэн юм.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
2 cэтгэгдэлтэй
Сайхан тоголж байгаа юм шүү,Монголын төрөөр.
ХУЛГАЙЧ ХУДАЛЧ ОДОО ОРГОН ЗАЙЛААД БАЙГАА ЦАХИАГИЙН ЭЛБЭГДОРЖ БОЛ ЖИНХЭНЭ ЛУЙВАРЧИН ХИЙСЭН ХЭРЭГ БҮРЭЭРЭЭ ЯЛ АВБАЛ ЯЛЫН ХЭМЖЭЭ ШОРОНД СУУХ ХУГАЦААГААРАА РЕКОРД ГЭЖ ХЭЛЖ БОЛДОГ БОЛ ТОГТООЖ 150 ЖИЛЭЭС НААШ ЯРИГДАХГҮЙ БАЙХ ШҮҮ.