• Халдварын голомттой бүс нутгаар аялсан хүмүүс өөрийгөө 14 хоног бусдаас тусгаарлаж, биеэ ажиглах хэрэгтэй

    ЭМЯ-наас цаг үеийн асуудлаар мэдээлэл хийлээ. Дэлхийн эрүүл мэндийн байгууллагын Халдварт өвчин хариуцсан мэргэжилтэн О.Ариунтуяа “Өнөөдрийн байдлаар коронавирусийн халдвараар нийт 20 мянга 630 хүн бүртгэгдсэнээс 429 хүн нас барсан. Нас баралтын түвшин 2.1 хувьтай, хэвээр байна.

    Нийт тохиолдлын 90 гаруй хувь нь БНХАУ-д бүртгэгдэж байгаа бөгөөд өнөөдрийн байдлаар 23 улсад 159 тохиолдол бүртгэгдээд байна. Коронавирусийн өвчлөл эрэгтэйчүүдэд илүүтэй давамгайлж байгаа тухай мэдээлж байна. Харин насны хувьд нийт тохиолдлын 80 гаруй хувь нь 30-70 настай хүмүүс байна.

    Вирусийн халдварын нууцлалын үе зургаан хоногтой байна. БНХАУ-аас бусад оронд гарч байгаа халдварын тохиолдол дандаа Хубэй мужид аялсан хүмүүсээс илэрч байгаа аж. Иймээс халдварын голомттой бүс нутгаар аялсан хүмүүс өөрийгөө 14 хоног бусдаас тусгаарлаж, биеэ ажиглах хэрэгтэй” гэдгийг зөвлөлөө.

    ЭМЯ-ны Шуурхай удирдлагын албаны дарга Д.Нарангэрэл “Дэлхий дахинд шинэ коронавирусын дэгдэлт эрчимтэй тархаж байна. Манай улс эрсдэл өндөртэй орны тоонд орж байна. Сүүлийн гурав дөрөв хоногт Эрээн, Замын-Үүд зэрэг хилийн боомтоор орж ирэх монгол иргэдийн тоо эрс нэмэгдэж байна. Энэ хүмүүс дунд халуурах шинж тэмдэгтэй хүмүүс орж ирж байна.

    Нэгдүгээр сарын 03-нд ДЭМБ-аас анхны зөвлөмжийг авснаас эхлээд бидний сургалт сурталчилгаа, мэдээлэл эхэлсэн. Гэтэл түүнээс хойш өвчлөл гарсан газар руу зорчиж ирээд биеийн байдал нь халуурах шинж тэмдэг илэрсэн тохиолдлууд байна. Тухайлбал Дархан-Уул аймагт нэг хүн тусгаарлагдсан. Энэ хүн дэлхий дахинд коронавирус тархсан энэ үед гадаад оронд зорчсон. Манай иргэд эрүүл мэндийн байгууллагаас өгч байгаа зөвлөмжийг анхаармаар байна.

    Мөн энэ хүн өөрийгөө тусгаарлаад эрүүл мэндийн байгууллагад хандаж байгаа нь манай зөвлөмжийг хэрэгжүүлж байгаа бас нэг сайн талтай. Иргэд гадаадын өвчлөл гарсан улс оронд зорчихгүй байх гэсэн зөвлөмжийг маш сайн мөрдөх хэрэгтэй байна. Зорчоод ирсэн тохиолдолд өөрийгөө 14 хоног дотроо ажиглаад, халуурах, суулгах, цээжээр өвдөх, ханиах зэрэг шинж тэмдэг илрэх юм бол маскаа зүүгээд эрүүл мэндийн байгууллагад хандах хэрэгтэй. Эрүүл мэндийн байгууллагынхан 24 цагийн бэлэн байдалтай ажиллаж байна. Цаашдаа ч улам эрчимжүүлж ажиллана” гэлээ.

     

    gereg.mn

    Холбоотой мэдээ