• “Ерөөлийн сарыг хараалаар бүү эхлүүлээсэй” хэмээн Төгсбуянт, Шар зурхайнхны хэрүүлчдэд анхааруулья

    Монголчууд талцах, хоорондоо хэрэлдэх дуртай хүмүүс. 2020 оны хулгана жилийн цагаан сар хэдийд тохиох тухай Төгсбуянтынхан, Чингисийн шар зурхайнхан маргалдаж мэтгэлцэх нь. Энэ бол шинэ юм биш л дээ, хуучны хэрүүл. Энэ удаа ийнхүү Монголын цагаан сар буюу Хаврын тэргүүн сарын шинийн нэгэн хэзээ болох талаар хэрэлдэж уралцах нь нэгэнт тодорхой боллоо.

    Энэ хэрүүлийн эхлэл нүүр номоор хэдийн тавигджээ. Тэгвэл 2020 оны хулгана жилийн Цагаан сар Чингис хааны шар зурхайгаар хаврын тэргүүн сарын шинийн нэгэн 2020 оны 1 дүгээр сарын 25-ны өдөр тохиох гэнэ. Харин бидний баримтлан тэмдэглэж ирсэн Төгсбуянтын зурхайгаар бол 2 дугаар сарын 26-ны өдөр Сар шинэ тохиох юм.

    Энэхүү Цагаан сараа хэзээ тэмдэглэх тухай хэл ам, хэрүүл тэмцэл ийнхүү 12 жилийн давтамжтай өрнөсөөр ирсэн. Төгсбуянтын зурхайг монголчуудын дийлэнх олонхи, тэр дундаа төр засаг ч баримталдаг. Буддын сүм хийдүүд, зурхайчид, МУИС-ийн багш Д.Тэрбиш бусад олон зурхайчдын зурлагыг төр засгаасаа эхлээд түмэн олон нь дагадаг.

    Харин Шар Зурхайн талыг баримтлагчид нь Монголын Зурхайчдын Холбооны Ерөнхийлөгч М. Намсрай, доктор Шарнууд овогт Д. Мөнх-Очир, Зурхай судлаач н.Сарандаваа, Үзмэрч агсан Ц.Дашцэрэн, бусад залуу судлаач, эрдэмтэд тэднийг дагалдагчид бөлгөө.

    Нэгэнт Монголд уламжлаад тогтчихсон Төгсбуянтын зурхайг Шар зурхайгаар солино гэж байхгүй. Тэгээд ч хятадуудын хаврын тэргүүн сарын шинийн нэгэнтэй Монголчууд заавал хамтатгах шаардлагагүй гэж үзэх сэтгэхүй монголчуудад бий.

    Тиймээс Шар зурхайнхан манайх Азийн бусад орноос өөр өдөр Цагаан сараа тэмдэглэх ёсгүй хэмээн улиглаад амжилт олохгүй гэдэг нь мэдээжийн хэрэг. Харин энэхүү явуургүй хэрүүлийн галыг бүү өрдөж, “Ерөөлийн сарыг хараалаар бүү эхлүүлээсэй” хэмээн сануулах гэсэн юм.

    gereg.mn

    Холбоотой мэдээ