• Монголбанкны Ерөнхийлөгч Н.Баяртсайхан, СЗХ-ны дарга С.Даваасүрэнг нарыг албан тушаалаас нь чөлөөллөө

    УИХ-ын чуулганы өнөөдрийн хуралдаанаар Санхүүгийн зохицуулах хорооны дарга, Монголбанкны Ерөнхийлөгчийг нарыг чөлөөлөх тухай асуудлыг үргэлжлүүлэн хэлэлцэж чөлөөллөө. Монгол Улс ФАТФ-ын “Саарал жагсаалт”-д орсонтой холбогдуулан Монголбанкны ерөнхийлөгч Н.Баяртсайхан, СЗХ-ны дарга С.Даваасүрэнд хариуцлага тооцохоор болсон. Уг асуудлыг энэ сарын 8-нд чуулганы нэгдсэн хуралдаанаар хэлэлццэж эхэлсэн ч МАН-ын бүлэг тав хоногийн завсарлага авсан юм.

    Монгол Улс ФАТФ-ын Саарал жагсаалтад орсонтой холбогдуулан дээрх байгууллагын удирдлагуудад хариуцлага тооцох шаардлага бий болсныг УИХ-ын дарга мэдэгдсэн. Үүнтэй холбоотойгоор СЗХ-ны дарга С.Даваасүрэн өөрийн хүсэлтээр чөлөөлөгдөх хүсэлтээ гаргасан бол УИХ-ын дарга Г.Занданшатар Монголбанкны ерөнхийлөгч Н.Баяртсайханыг огцруулах асуудлыг Их хуралд оруулсан билээ.

    Харин албаны эх сурвалжийн хэлснээр Монголбанкны Ерөнхийлөгч Н.Баяртсайхан үүрэгт ажлаасаа чөлөөлөгдөх хүсэлтээ УИХ-ын даргад хүргүүлсэн. Ийнхүү Н.Баяртсайханыг Монголбанкны Ерөнхийлөгчийн албан тушаалаас огцруулах бус өөрийнх нь гаргасан хүсэлтийн дагуу чөлөөлөв.

    Эхлээд СЗХ-ны даргыг чөлөөлөх тухай асуудлыг хэлэлцэж, УИХ-ын тогтоолын төслийг дэмжих эсэхээр санал хураалт явууллаа. Санал хураалтад 43 гишүүн оролцож,  26 нь дэмжиж, 17 татгалзсанаар  СЗХ-ны дарга С.Даваасүрэнг үүрэг ажлаас нь чөлөөллөө.

    Үргэлжлүүлэн Монголбанкны ерөнхийлөгч Н.Баяртсайханыг чөлөөлөх асуудлыг хэлэлцэж байна. Тэрбээр үүрэгт ажлаасаа чөлөөлөгдөх хүсэлтээ 2019 оны арваннэгдүгээр сарын 15-ны өдөр УИХ-ын даргад хүргүүлжээ. Монголбанкны ерөнхийлөгч Н.Баяртсайханыг өөрийн хүсэлтээр үүрэг ажлаас чөлөөлөх эсэхээр санал хураалт явуулахад хуралдаанд оролцсон гишүүдийн 57.1 хувь нь дэмжив.

    Үргэлжлүүлэн Оюутолгой ордын ашиглалтад Монгол Улсын эрх ашгийг хангуулах тухай УИХ-ын тогтоолын төслийг хэлэлцэж эхлээд байна.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ