Энэхүү баримлын эргэн тойронд дөрвөн чулуун обелиск нь шинжлэх ухаан, оюун ухаан, олон улсын харилцаа, засгийн газрын үйл ажиллагааны янз бүрийн чиглэлийг төлөөлнө
Төрийн нэрт зүтгэлтэн Евгений Примаковын хөшөөг мягмар гарагт Москва хотод нээлээ. ОХУ-ын Ерөнхийлөгч Владимир Путин Смоленскийн талбай дээрх Оросын Гадаад хэргийн яамны байрны эсрэг талын талбайд болсон ёслолд оролцов.
Энэхүү хөшөөг ОХУ-ын Ардын зураач Георгий Франгулян тэргүүтэй барималчдын баг бүтээжээ. Примаковын ач хүү, сэтгүүлч, Төрийн Думын депутат Евгений Примаковын хэлснээр баримлын эргэн тойрон дахь дөрвөн чулуун хийц нь шинжлэх ухаан, тагнуул, олон улсын харилцаа, засгийн газрын үйл ажиллагааны чиглэлийг хамарна. Парламентын гишүүний үзэж буйгаар Примаковын хөшөөг босгосон нь улс төрчийн гавьяаг ард иргэд, түүний дотор Москвагийн оршин суугчид хүлээн зөвшөөрч буйн бэлгэдэл ажээ.
ОХУ-ын Ерөнхийлөгчийн хэвлэлийн нарийн бичгийн дарга Дмитрий Песковын мягмар гарагт тэмдэглэснээр Путин Примаковыг сайн мэддэг, тус улсад үзүүлсэн хувь нэмрийг нь үнэлж, олон улсын болон дотоодын асуудалд түүний санал бодлыг үргэлж сонсдог байсан аж. Путин өөрөө өмнө нь Примаковыг “үнэхээр өвөрмөц харьцаатай”, мэргэжлийн ур чадвар, менежментийн туршлага, өргөн цар хүрээтэй “ажлын хамгийн нарийн төвөгтэй, хариуцлагатай салбарт эрэлт хэрэгцээ ихтэй хүн байсан ” гэж байжээ.
Примаковын нэр нь Оросын гадаад бодлогын нэгэн эргэлттэй салшгүй холбоотой юм. Тэр нь олон өнцөгт ертөнцийн үзэл баримтлалын төлөө Атлантын далайг гатлан нисэхээс татгалзсан явдал. 1999 онд Югославыг бөмбөгдөж эхэлсэн тухай мэдээг сонсмогцоо Атлантын далайн дээгүүр Вашингтон руу нисэхээс татгалзсаныг нь “Атлантын далайгаас эргэсэн нь” гэж нэрлэдэг.
Евгений Примаков 1929 оны 10-р сарын 29-нд Киев хотод төрсөн. Тэрээр бага нас, залуу насаа Тбилис хотод өнгөрөөж, 1953 онд Москвагийн Дорно дахины судлалын дээд сургуулийн Арабын тэнхимийг “Арабын орнуудыг судлаач” мэргэжлээр төгсч, 1956 онд М.В.Ломоносовын нэрэмжит Москвагийн Улсын Их Сургуулийн Эдийн засгийн факультетийн аспирантурыг төгссөн. Тэрээр сэтгүүл зүй, шинжлэх ухааны чиглэлээр ажиллажээ, 1979 онд ЗХУ-ын Шинжлэх ухааны академийн академич, 1980-аад оны хоёрдугаар хагасаас Горбачевын перестройкийн удирдагчдын нэг болсон.
1991 оны 12-р сараас 1996 оны 1-р сар хүртэл Примаков ОХУ-ын Гадаад тагнуулын албаны захирлаар, 1996-1998 онд Гадаад харилцааны сайдаар ажиллаж, 1998 оны 9-р сараас 1999 оны 5-р сар хүртэл засгийн газрыг тэргүүлж байв. Үүний дараа Примаков Төрийн Думд сонгогдсон бөгөөд 2001 оны 12-р сараас 2011 оны 2-р сар хүртэл ОХУ-ын Худалдаа аж үйлдвэрийн танхимыг тэргүүлжээ. Үүний зэрэгцээ тэрбээр улс орны удирдагчдын гадаад бодлогод зөвлөдөг байжээ.
Примаков 2015 оны 6-р сарын 26-нд 85 насандаа таалал төгссөн байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.