Видео: Сайжруулсан шахмал түлшийг хэрэглэх аюулгүй ажиллагааны зааварчилгаа

“Тавантолгой Түлш” ХК-ийн зөвлөх З.Золжаргал шахмал түлшийг хэрэглэх аюулгүй ажиллагааны зааварчилгааг өглөө. Дараах дөрвөн зөвлөмжийг дагаснаар дутуу шаталт, угаарын хий үүсэхээс сэргийлж, эрүүл мэндээ хамгаалах боломжтой.

1. Зуух болон ханан пийшингийн холболтын бүрэн бус битүүмжлэгдсэн байдал нь дутуу шаталтыг үүсгэдэг. Иймээс ханан пийшингээ зуухтайгаа холбохдоо бүрэн бүтэн, битүүмжлэх хэрэгтэй.
2. Пийшинг хөөлөхгүй удвал агаарын урсгалыг бөглөн, улмаар зууханд угаар үүсэх нөхцлийг бүрдүүлдэг учраас тогтмол цэвэрлэгээ хийж байх хэрэгтэй.
3. Стандартын дагуу ханан пийшинд тортгоо авах хаалт, нээлтийг шийдэж өгсөн байх ёстой. Тортог дүүрсэн тохиолдолд агаарын сувгийг бөглөн, зуухнаас агаар татахгүй болж, улмаар дутуу шаталт үүсч, угаарын хий ялгардаг.
4. Ханан пийшинг удаан хугацаанд галлаагүй бол аюулгүй байдлаа ханган өдрийн цагаар туршилтын галлагаа хийх хэрэгтэй.