• УИХ-ын намрын чуулган нээлтээ хийлээ

    2019-10-01

    УИХ-ын 2019 оны намрын ээлжит чуулган 74.7 хувийн ирцтэйгээр нээлтээ хийв. Чуулганыг УИХ-ын дарга Г.Занданшатар нээж үг хэлснээр чуулганы хуралдаан үдээс хойш үргэлжлэхээр боллоо. 

    УИХ-ын дарга Г.Занданшатар “УИХ-ын 2016 оны сонгуулийн үр дүнгээр байгуулагдсан долоо дахь удаагийн парламентын бүрэн эрхийн хугацаа өндөрлөхөд ердөө хоёр ээлжит чуулган үлдэж байна. Энэ чуулганы дараа 2020 оны хаврын ээлжит чуулган бий.

    Тиймээс өнгөрсөн гурван жилийн үйл ажиллагаандаа үнэлэлт, дүгнэлт  өгөх, дутуугаа гүйцээх, хүлээлт үүсгэсэн зайлшгүй чухал асуудлуудыг хойшлуулашгүй хэрэгжүүлэх үүрэг хариуцлага та бидэнд оногдож байна. Энэ хэрээр УИХ-ын намрын чуулган шахуу хуваарьтай өндөр ачаалалтай ажиллана.

    Ард түмний засаглах эрхийн залгуур дээр сууж байгаа бидэнд улсаа өөд татах амласнаа хэрэгжүүлэх, төр нь тогтвортой түмэн нь амгалан зөвхөн хуулиар засаглаж шударга ёс, сахилга хариуцлага нийгмийн зайшгүй хэм хэмжээ болох иргэдийнхээ хүсэмжлэлийг биелүүлэх олон зорилт бидэнд үлдэж байна.

    Зорилгоо хэрэгжүүлэх нэг зам нь эрх зүйн хүрээнд хийгдэх өөрчлөлт юм. 2019 оны намрын чуулганы түүхэн үүрэг, хариуцлага чухам үүнд чиглэгдэнэ. Та бид Үндсэн хуульд оруулах нэмэлт, өөрчлөлтийн төслийг ихээхэн цаг хугацаа, хүчин чармайлт зарцуулан хэлэлцсэн.

    Монгол Улс, ард түмний эрх ашгийг нэн түрүүнд тавьж зөвшилцөл, ойлголцлыг эрхэмлэж, ард нийтийн санал асуулгад оруулах эхийг хэлэлцэж баталсан. Үндсэн хуулийн нэмэлт, өөрчлөлт бол нийгмийн захилга юм. 10 жил, гурван парламент дамжиж хэлэлцэгдсэн төсөл юм. Энэ нь аль нэг нам, цөөн хэдэн хүний санаачилга биш. Энэ бол өнгөрсөн 20 жилийн замаа эргэн харж туршлага сургамжаа эргэцүүлсэн ухаарал юм” гэлээ.

    УИХ-ын чуулганы үдээс хойших хуралдаанаар төсвийн гүйцэтгэлийн асуудлыг хэлэлцэнэ.

     

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ