Монголбанкны тэргүүн асан Н.Золжаргал Австрид 650 мянган ам.долларын үл хөдлөх хөрөнгө худалдан авчээ

2019-06-20

Монголбанкны Ерөнхийлөгч асан Н.Золжаргалыг Австрид үл хөдлөх хөрөнгө худалдаж авсан гэх үйлдлийг шалгаж дууссан бөгөөд 650 мянган ам.доллараар тус улсад үл хөдлөх хөрөнгө худалдан авсан гэдгийг Австрийн прокурорын газар баталсан гэнэ. Тиймээс Н.Золжаргалыг үндэслэлгүйгээр хөрөнгөжсөн байж болзошгүй хэмээн буруутгаж, шүүхэд шилжүүлэхээр болоод байгаа аж.

Н.Золжаргалыг Монголбанкны Ерөнхийлөгч байхдаа ХХБ болон Улаанбаатар хотын банкинд дэмжлэг үзүүлж, бага хүүтэй мөнгө шилжүүлсэн, “Эрдэнэт үйлдвэр”-ийн 49 хувийг “Монголын зэс корпораци” ХХК-ийнхан авахад Монголбанк баталгаа гаргасан гэх үндэслэлээр АТГ болон ЭЦА-ны хамтарсан ажлын хэсгийнхэн санал гаргаж, яллагдагчаар татаад байгаа билээ.

АТГ-аас нэг удаа мэдээлэл хийхдээ “Н.Золжаргалд холбогдуулан гурван багц асуудлыг шалгаж байна. Монголбанкны ерөнхийлөгчөөр ажиллаж байхдаа арилжааны банкуудад хуулиар тогтоосон хэмжээнээс бага хүүтэй зээл олгосон, Австри улс руу мөнгө шилжүүлж, байшин хуралдан авсан. Хууль зөрчсөн хэлцэл хийсэн байж болзошгүй гэсэн үндэслэлээр мөрдөн шалгах ажиллагаа явуулж байгаа. Эдгээр асуудлыг энэ оны хоёрдугаар улиралд багтаан дуусгана” гэдгээ мэдэгдэж байлаа.

Тэгвэл, АТГ-ын мөрдөн шалгах ажиллагаа дуусч, шүүхэд шилжүүлэх саналтайгаар НПГ-т хүргүүлсэн тухай зарим эх сурвалж мэдээлж эхэллээ.

 

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ