• Улирал бүр улавчны мөнгө гэж 12-15 мянган төгрөг авдаг боловч нэг ч улавч өгөөгүй зэрэг зарим гомдлыг АТГ шалгаж байна

    2019-06-10

    “АТГ анги засварын мөнгө хураасан 42 багшийг шалгаж байна” гэсэн мэдээлэл зарим цахим сайтаар тархсан. Тэгвэл АТГ-ын Хэвлэлийн төлөөлөгч Т.Мөнхтунгалагийн сошиал сүлжээндээ бичсэнээр энэ ташаа мэдээлэл ажээ. Түүний бичсэнээр  АТГ он гарсаар өнөөг хүртэл боловсролын салбарт хамаарах 42 гомдол иргэдээс ирүүлснийг хүлээн авч, шалгаж шийдвэрлээд байгаа аж.  Энэ 42 нь сургууль ба цэцэрлэгийн захирал, эрхлэгч нарт хамаатай аж.

    Учир нь  сургууль, цэцэрлэгийн удирдлага л  Авлигын эсрэг хуулийн үйлчлэлд хамаардаг субъектүүд ажээ. Багш нар Авлигын эсрэг хуулийн үйлчлэлд хамаардаг субьектүүд биш аж.  АТГ-д шалгагдаж байгаа сургууль,цэцэрлэгийн эрхлэгч нарын асуудал нь  анги засварын мөнгө төдийхөн биш, өөр олон асуудал бий гэнэ.

    Одоогоор АТГ-д шалгагдаж байгаа иргэдээс ирсэн  ямар гомдлуудыг шалгаж байгаа талаараа  АТГ-ын цахим хуудасны ЭНД нийтэлжээ.

    Үүнд: 

    • Нийслэлийн Сонгинохайрхан дүүргийн 216 дугаар цэцэрлэгийн эрхлэгч О.Алтанцэцэг нь хичээлийн жилд хүүхэд элсүүлэхдээ 300-600 мянган төгрөгийн хандив авдаг, ангийн хүүхдүүдийн тоо хэтэрсэн, бага бүлэгтээ нас хүрээгүй хүүхдүүдийг авдаг, тус цэцэрлэгт багшлах эрхгүй 3 багш ажилладаг, даавуу улавчны мөнгө гэж хүүхэд бүрээс 10 мянган төгрөг авсан, хүүхдийн хоолны тооцоог бодохдоо бодит бус хүүхдийн тоогоор хийдэг” гэх гомдол;
    • Нийслэлийн Баянгол дүүргийн 179 дүгээр цэцэрлэгийн багш Хишигсүрэн болон бусад багш нар анги засварын мөнгө гэж нэг хүүхдээс 15-30 мянган төгрөг авч байна, би Хишигсүрэн багшийн хувийн данс руу 15 мянган төгрөг шилжүүлсэн” гэх гомдол;
    • Нийслэлийн Сонгинохайрхан дүүргийн 105 дугаар сургуульд шинэ орсон хүүхэд бүрээс 3000 төгрөг хураан авч байна, шалгалт шүүлгийн үеэр байнга мөнгө хураадаг. Эцэг, эхчүүд бид хүлээн зөвшөөрөөд өгдөг. Гэхдээ өнгөрсөн жил ой хийгээд цугларсан мөнгөөрөө юу хийсэн нь тодорхойгүй. Зам, талбай нь эвдэрхий хэвээрээ байх юм. Ийм байж 3000 төгрөг хурааж байгааг нь ойлгохгүй байна” гэх гомдол;
    • Архангай аймгийн Засаг даргын орлогч Б.Болормаа нь аймгийн ерөнхий боловсролын сургуулиудын Үдийн цай, хүүхдийн хоолны тендерийг албан тушаалын байдлаа урвуулан ашиглаж, өөрт ашигтай байдлаар авдаг, нөхөр Б.Эрдэнэсүрэн нь аймгийн төвийн болон сумын сургууль, цэцэрлэгүүдэд чацаргана, цагаан идээ зэрэг хүнсний бүтээгдэхүүнийг давуу эрхээр шахдаг, тендерийн санхүүжилтийг авахдаа богино хугацаанд гаргуулдаг” гэх гомдол;
    • Нийслэлийн Сүхбаатар дүүргийн 14 дүгээр цэцэрлэг бүх хүүхдээс засварын мөнгө гэж 30 мянган төгрөг авч байна. Өнгөрсөн жил мөн ийм хэмжээний мөнгө авсан боловч засварын ямар ч ажил хийгээгүй байсан. Мөн улирал бүр улавчны мөнгө гэж 12-15 мянган төгрөг авдаг боловч нэг ч улавч өгөөгүй. Энэ талаар эцэг, эхчүүд гомдол гаргая гэхээр айгаад гомдол гаргаж чаддаггүй. Энэ хандлага дээр багш, ажилтнууд дөрөөлж дураараа мөнгө төгрөг хурааж байгаа асуудлыг шалгаж таслан зогсоож өгнө үү” гэх гомдлыг тус тус Авлигатай тэмцэх газрын Хяналт шалгалт, дүн шинжилгээний хэлтсээс хянан шалгаж байна.

     

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ