• Хэнтийн 42 дугаар тойрогт АН-ын “Гурван баатар” нэгийгээ үзэж, нэхийгээ тайлалцана

    Өчигдөр Хэнтий аймаг дахь 42 дугаар тойргийн нөхөн сонгуульд нэр дэвших зарим хүмүүсийн нэр ил боллоо. Тухайлбал МАХН дарга Н.Энхбаярыгаа нэр дэвшүүлж байгаагаа Бага чуулганаараа ёсчилсон. Мөн Хэнтий аймгийн АН-ын хороо хуралдаж, УИХ-ын 42 дугаар тойргийн нөхөн сонгуульд Ж.Оюунбаатрыг дэвшүүлэхээр болж энэхүү шийдвэрийг АН-д хүргүүлж, Үндэсний бодлогын хорооны хуралдаанаар хэлэлцэн баталж өгөхийг хүслээ.

    АН-ын шинэчилсэн Дүрмийн хүрээнд намын анхан, дунд шатны гишүүдийн саналаар тодорсон нэр дэвшигчийг хэлэлцэн батлах дүрэмтэй. Тиймээс АН-ын Үндэсний бодлогын хорооны хуралдаанаар Ж.Оюунбаатарыг батламжлах юм. АН-ын ҮБХ тавдугаар сарын 27-ны өдөр хуралдах гэнэ.

    Ж.Оюунбаатар нь 2012-2016 онд Хэнтий аймгийн Засаг даргаар ажиллаж байсан. Тэгвэл эрх баригч МАН энэ сарын 28-нд Бага хурлаа хуралдуулж, нэр дэвшигчээ дэвшүүлнэ.

    Харин ирэх даваа гаригт ҮХЦ-ийн хуралдаанаар Д.Гантулгыг УИХ-ын гишүүнээс чөлөөлсөн тогтоол Үндсэн хуулийг зөрчсөн эсэхийг тогтооно. Хэрвээ Үндсэн хууль зөрчсөн гэдэг нь тогтоогдвол 42 дугаар тойргийн нөхөн сонгууль цуцлагдаж, Д.Гантулга эргээд УИХ-д суух болно.

    Харин Үндсэн хууль зөрчөөгүй хэмээн ҮХЦ дүгнэвэл нөхөн сонгууль болдогоороо болно. Тэгвэл намуудаас нэр дэвшигчид төдийгүй бие даагчид уг сонгуульд нэрээ дэвшүүлэх байх. Энэ дунд АН-аас нэр дэвшигч Ж.Оюунбаатарт хамгийн их шавар хаалтууд бий.

    АН-ын дарга байж тус намыг мандуулж явсан Н.Алтанхуяг намаасаа хасагдсандаа тун шаралхуу заавал намаа цэвэрлэнэ гэж яваа. Тэрбээр энэ удаагийн нөхөн сонгуульд Д.Хүдэрбаатарыг бие даалгана гэж буй. Энэ сацуу АН-аас УИХ-д сууж байсан Н.Гарамгайбаатар бас бие дааж өрсөлдөнө хэмээн зарласан. Тиймээс АН-ын нэр дэвшигчид нам нэгт “Баатар”-ууд нь шавар хаах нь тодорхой аж. Ийнхүү АН-аас өмнөх 2016 оны сонгуульд Хэнтий аймагт нэр дэвшин өрсөлдсөн “Гурван баатар” энэ удаагийн нөхөн сонгуульд нэгийгээ үзэж нэхийгээ тайлалцах нь.

    gereg.mn

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ