• Аз жаргалтай гэр бүлийн таван нууц  

    Гэр бүлийн аз жаргал нь хүний амьдралын гол утга учир хэмээн “Монгол гэр бүлийн ширээний ном”-д өгүүлжээ. “Гал голомт” үндэсний хөдөлгөөний тэргүүн,Эрүүлийг хамгаалахын гавъяат ажилтан Д.Мөнхөөгийн санаачлан хэвлүүлсэн уг номын зарим хэсгээс GEREG.MN сайт цувралаар толилуулж байна. Энэ удаа бид “Аз жаргалтай гэр бүлийн таван нууц” нийтлэлийг хүргэж байна.

    Аз жаргалд умбан амьдралыг хамтдаа туулж байгаа гэр бүлүүдийг нэгтгэх ямар шинж байна вэ гэдгийг нэлээд судалсны эцэст сэтгэл зүйч эрдэмтэд 5 шинжийг илрүүлжээ.Хүмүүс танилцаад, дурлаад, гэрлээд… Дараа нь зарим нь бүх насаараа хамтдаа, аз жаргалтай амьдардаг бол олон гэр бүл таарч тохирохгүй, хэрүүл зодоон болон салж сарнидаг. Зарим нэг нь салаагүй ч, ямар ч аз жаргалгүйгээр өдөр хонгийг өнгөрүүлдэг.

    Канзасын Их Сургуулийн сэтгэл зүйн мэргэжилтнүүд Барбара Керрийн удирдлаган дор олон жилийн турш аз жаргалтай гэр бүлүүдийг судалж доорх дүгнэлт гаргасан байна.

    Нууц №1. Оройн зоог

    Аз жаргалтай гэр бүлийн гишүүд оройдоо нэг ширээнд (дугуй юмуу зууван ширээ илүү сайн) сууж оройн хоолоо идэнгээ ярилцдаг байна. Тэр өдөр өөрсөддөө тохиолдсон сонин содонгоо ярих, элдэв асуудлаа хэлэлцэх, хошин юм ярих гэх мэтээр. Энэ үед зурагтаа заавал унтраана, тэгэхгүй бол анхаарал сарниад халуун дотно харьцаанд саадтай байдаг гэнэ. Чухал асуудлуудыг мөн оройн зоогийн үеэр хэлэлцэж шийднэ. Гэр бүлийн ямар нэгэн гишүүнд хэцүү зүйл тулгарсан бол бусдынх нь дэмжлэг түүнд ихээхэн тус дэм болдог байна. Гэр бүл ер нь эмчилгээний жижигхэн хэсэг юм гэдэг онол байдаг. Германы сэтгэл судлаач Берт Хеллингерийн хэлснээр, зүгээр ч нэг хэсэг биш, маш их нөөц бололцоотой хэсэг гэнэ шүү. Энерги болон сэтгэл зүйн нөөц нь шавхагдашгүй нандин сайхан хэсэг.

    Нууц №2. Ажил эрхлэлт

    Аз  жаргалтай  гэр  бүлийн  бүх  гишүүд  өөр  өөрийн  ажил  алба, өөрсдөд нь баяр баясгалан өгдөг сонирхол, хоббитой байдаг ажээ. Эхнэр нөхөр хоёр хоёулаа ямар нэгэн ашиг орлого авчирдаг юм хийдэг. Эдийн засгийн статус болон орлогын хэмжээ нь энд чухал биш аж. Аз жаргалын хэмжээ гэр бүлийн эдийн засгийн байдлаас ер хамаардаггүй нь батлагдсан байна. Энд хамгийн гол юм нь – хүмүүсийн хоорондын харьцаа, нэг нэгийнхээ сонирхолд хүндэтгэлтэй хандах, нэг нэгэнтэйгээ сэтгэл санаагаа хуваалцах хүсэлтэй байх зэрэг асуудал байдаг гэнэ.

    Нууц №3. Ганцаардах боломж

    Гэр бүлийн гишүүн бүрт ганцаараа байх газар байх ёстой. Гэр бүлийн гишүүн бүрт, бүр жижигхэн хүүхдэд ч өөрийн хувийн орон зай байдаг бөгөөд бусад нь түүн рүү нь өнгийдөггүй, тэр орон зайг нь маш их хүндэлдэг аж. Тус тусын өрөөгүй ч бай, хүн ганцаараа суугаад бодлоо бодох, юм унших бололцоо бүхий булан аз жаргалтай айлд заавал байдаг юм байна. Ялангуяа эрчүүд ганцаараа хэсэг хугацаанд байх их дуртай байдаг аж.

    Дээр үед эрчүүд галын дөлийг ширтэн суух дуртай байсан бол орчин үеийн эрчүүд автомат угаалгын машиныг ажиллаж байхад нь ширтээд суух дуртай гэнэ.  Дашрамд хэлэхэд, зурагт “гөлрөх объект” болж чаддаггүй, учир нь мөнхийн зүйлсийн тухай бодоход логик сэтгэлгээг хариуцдаг тархины зүүн тал унтарсан байх ёстой юм байна.

    Нууц №4. Хатуу дүрэмгүй байх

    Аз жаргалтай гэр бүлд эрх чөлөөний агаар ноёлдог. Энд ямар ч хатуу дүрэм, гэр бүлийн гишүүдэд заавал хийх хатуу үүрэг байдаггүй. Аз жаргалгүй гэр бүлд харьцаа муу байх тусам төдий чинээ олон хориг нэг нэгэндээ тавьсан байдаг. Чи ингэж болно, ингэж болохгүй, ингэх үүрэгтэй, энэ бас болохгүй гэх мэт. Хэрэв гэр бүлийн гишүүдийн харьцааны үндэс нь итгэл, дотно хөнгөн харьцаа, нэг нэгийгээ байгаагаар нь хайрлах бол гэр бүл аяндаа аз жаргалтай байдаг. Ямар ч сэдвээр гэрийнхэнтэйгээ чөлөөтэй харьцаж чаддаг, хамгийн гол нь та гэртээ бушуухан харихыг боддог бол танай гэр бүл аз жаргалтай гэсэн үг.

    Нууц №5. Хуримын бөгж зүүх

    “Хэдэн мянган гэр бүлийг судлахад, эхнэр нөхөр хоёр хоёулаа хуримын бөгжөө байнга зүүдэг бол хүүхдээ сайн хүмүүжүүлдэг сайн эцэг эх байдаг гэсэн дүгнэлт гарчээ.Ийм эцэг эхийн хүүхэд хөгжил сайтай, эрүүл мэнд бие бялдар мөн сайтай, тэдэнтэй эвгүй зүйл тохиолдох нь хавьгүй бага байдаг аж.

    Учир нь хуримын бөгжөө зүүдэггүй хүмүүс өөрийнхөө гэр бүлийг бүрэн дүүрэн хүлээн зөвшөөрдөггүй гэсэн үг, тэгэхээр автоматаар, хүүхдийнхээ өмнө хүлээх хариуцлагаа ухамсарладаггүй, хүүхэддээ бүрэн дүүрэн анхаарал хандуулдаггүй гэнэ. Хүүхэд энэ бүхнийг мэдэрдэг болохоор дүрсгүйтэх, зөрүүдлэх зэрэг зан гаргаж өшөөгөө авдаг байна. Үр дүн нь сурлага муу, ууртай, өвдөмтгий гэх зэргээр илэрдэг ажээ.

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ