• ЗГХЭГ-ын дарга Л.Оюун-Эрдэнэ шүүгч М.Батсуурь, Х.Идэр нарын асуудлаар Ерөнхийлөгчид хандлаа

    ЗГХЭГ-ын дарга Л.Оюун-Эрдэнэ Улсын Дээд шүүхийн Захиргааны танхимын тэргүүн М.Батсуурь, Сүхбаатар дүүргийн шүүхийн шүүгч Х.Идэр нарт хариуцлага тооцуулахаар Ерөнхийлөгч Х.Баттулга, АТГ-ын дарга Х.Энхжаргал, Шүүхийн ерөнхий зөвлөлийн дарга Н.Лүндэндорж,  Шүүхийн ёс зүйн хорооны дарга Н.Эрдэнэцогт нарт ханджээ.

    Шүүгч Х.Идэр нь шийдвэр гаргахдаа Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 6.5, Шүүгчийн эрх зүйн байдлын тухай хуулийн 29.1 дэх заалтуудыг тус тус зөрчсөн байна. Харин Улсын Дээд шүүхийн Захиргааны танхимын тэргүүн М.Батсуурийг Шүүгчийн эрх зүйн байдлын тухай хуулийн 29.1, 37.1 дэх заалтуудыг илтэд зөрчиж байгаа бөгөөд Үндсэн хуулийн Нэгдүгээр зүйлийн 2 дахь хэсэгт заасан төрийн үйл ажиллагаанд баримтлах “хууль дээдлэх” үндсэн зарчимд нийцэхгүйн зэрэгцээ хүний эрх, эрх чөлөө, шударга ёс, хуулийг дээдлэн хамгаалж, шүүгчийн ёс зүйг чанд сахих шүүгчийн тангаргаа зөрчсөн үйлдэл гэж үзсэн байна.

    Учир нь ХХБ-ны удирдлагууд болох Д.Эрдэнэбилэг, О.Орхон, “Монголын зэс корпораци”-ийн Пүрэвтүвшин нарыг шалгаж буй үнэдэслэлээр цагдан хорих асуудлыг Х.Идэр шүүгч хууль зөрчсөн гэж үзсэн юм.

    Харин М.Батсуурийг ХХБ-нд ажиллаж байсан хийгээд аав Мишиг нь Эрдэнэтийн 49 хувийг авахад хөрөнгө босголцсон компанийн нэгийг удирдаж байсан зэргийг үндэслэл болгосон байна.

    Шүүгчийн ёс зүйд харшилсан, хууль бус үйлдлүүдэд нь Шүүгчийн эрх зүйн байдлын тухай хуулийн 31.1-д заасны дагуу Улсын Дээд шүүхийн Захиргааны танхимын тэргүүн М.Батсуурь, Сүхбаатар дүүргийн шүүхийн шүүгч Х.Идэр нарт хариуцлага тооцуулахаар ЗГХЭГ-ын дарга Л.Оюун-Эрдэнэ ийнхүү дээрх эрх бүхий байгууллага, албан тушаалтнуудад хандаад байна.

    АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

    Холбоотой мэдээ