“Монголын эдийн засгийн форум”-ыг шууд дамжуулж иргэд, бизнес эрхлэгчид үгээ хэлж, асуулт тавьж болно

2018-05-16 09:43      gereg

 

Энэ тавдугаар сарын 21-22-нд “Монголын эдийн засгийн форум 2018” 8 дахь удаагаа, “Хүчээ нэгтгэе” уриатайгаар Төрийн ордонд болох гэж байна. Энэ талаар Ерөнхий сайдын захирамж гарчээ.

Форумаар Засгийн газрын зүгээс чуулганд оролцогч бизнес эрхлэгч, гадаад дотоодын хөрөнгө оруулагчдад Монгол Улсын хөрөнгө оруулалтын дунд хугацааны хөтөлбөрөө танилцуулах бол бизнес эрхлэгчдийн зүгээс форумаас илүү үр дүн гарна гэсэн хүлээлттэй байна.

Үүнийг чуулга уулзалт хангаж, олон талын оролцоотойгоор илүү ажил хэрэгч, үр дүнтэй болно гэдгээ чуулганыг зохион байгуулах Ажлын хэсгийн ахлагч, Засгийн газрын ХЭГ-ын дарга Г.Занданшатар хэлж байна.

Тодруулбал, Монголын эдийн засгийн тогтвортой хөгжлийн бодлогыг тодорхойлох, тулгуур салбаруудын тулгамдсан асуудлаар бодлого боловсруулагчид, бизнес эрхлэгчид, эрдэмтэн судлаачид, гадаадын хөрөнгө оруулагчид болон хандивлагчид, иргэний нийгмийн төлөөлөл оролцон нээлттэй хэлэлцүүлэг зохион байгуулж зөвшилцөлд хүрэхэд чиглэнэ гэж байна.

Энэ удаагийн чуулганаар “Монгол Улсын хөгжлийн загвар”, “Хөрөнгө оруулалтын нэгдсэн бодлого” сэдвээр нэгдсэн хуралдаан болж, “Аж үйлдвэрийн IV хувьсгал” “Төр-хувийн хэвшлийн түншлэл” нээлттэй хэлэлцүүлэг өрнүүлэх аж

Мөн хөдөө, аж ахуй, аялал жуулчлал, эдийн засгийг хөгжүүлэх, төвлөрлийг сааруулах бодлого, Монгол Улсын брединг, Улаанбаатар хот, мега төслүүд, тэтгэврийн шинэчлэл баялгийн сан, хариуцлагатай манлайлал ба эргэх холбоо, дижитал шилжилт зэрэг 12 салбар хуралдаан зохион байгуулахаар бэлтгэлээ хангаад байгаа гэнэ.

Эдийн засгийн форум зохион байгуулахтай холбогдуулан http://mef2018.mn/ сайтыг нээн ажиллуулах юм байна. Мөн тусгай апплейкшн ажиллуулах юм байна. Энэ апп болон сайтаар дамжуулан форумын шууд дамжуулалтыг үзэж асуултаа илгээх боломжтой аж.  

Форумд МҮХАҮТ, СЕО клуб, Улаанбаатар Худалдааны танхим, Монголын Бизнесийн зөвлөл, Монгол-Америкийн Худалдааны танхим идэвхтэй оролцоно гэж байна.

Жишээ нь, МҮХАҮТ-ын Удирдах зөвлөлийн дарга бөгөөд Ерөнхийлөгч Б.Лхагважав, хэрэв форум харилцан нэг нэгнээ сонсож хамтран ажиллана гэж байгаа бол төрийнхөн (ялангуяа гүйцэтгэх албаны яам, тамгын газар, агентлагийн дунд түвшний дарга нар) энд бүрэн оролцох хэрэгтэй.

Хэрэв тэгэхгүй юм бол бид бизнес эрхлэгчдээ аваад бид ч бас гарна шүү. Энэ бол бэлэг тэмдэгийн арга хэмжээ биш шүү хэмээн мэдэгдсэн.

Б.БИЛГҮҮН

 




Манай сайт таалагдаж байвал л LIKE дараарай


Сэтгэгдэлүүд


Анхааруулга! Уншигчдын бичсэн сэтгэгдэлд gereg.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл нэмэх