Хан-Уул дүүрэгт шинэ цэвэрлэх байгууламж нээгдлээ

2018-11-07 16:55      ГэрэгМН

Хан-Уул дүүргийн 10 дугаар хорооны нутаг дэвсгэрт баригдсан  лагийг дахин боловсруулан метан хий гаргаж үйлдвэрлэлийн дулаанд ашиглах шинэ дэвшилтэт технологи бүхий ус хангамж, ариутгах татуургын барилга байгууламж болох Буянт-Ухаа орон сууцны хорооллын 20000 м3/хоног хүчин чадалтай бохир ус цэвэрлэх байгууламжийн нээлтийн үйл ажиллагаа 2018.11.06-ны өдөр зохион байгуулагдаж байна.

Тус төсөл арга хэмжээ нь улсын төсвийн хөрөнгө оруулалтаар Барилга, хот байгуулалтын яамны “Дэд бүтэц” төслийн хүрээнд хэрэгжсэн бөгөөд ажлын гүйцэтгэгчээр “Эйч Эн Си” ХХК нийт 33 тэрбум төгрөгийн төсөвт өртгөөр барьсан бүтээн байгуулалтын ажил юм.

Улаанбаатар хотын Баруун Өмнөд хэсэг буюу Яармаг, Нисэхийн орон сууцны хуучин, шинэ хорооллын 160 мянган айл өрх, аж ахуйн нэгж объектуудын бохир усыг цэвэрлэн татан зайлуулах хүчин чадалтай барилга байгууламж юм.

Хуучин ашиглаж байсан Нисэхийн цэвэрлэх байгууламжид хоногт 2500-2800м3 бохир усыг хүлээн авч байгаа нь байгууламжийн хүчин чадлаас хэтэрсэн, бохир усыг цэвэрлэж чадахгүй байдалд хүрсэн.

Ашиглагч байгууллага болох Ус сувгийн удирдах газартай хамтран хуучин цэвэрлэх байгууламжид хүлээн авдаг бохирыг шинэ цэвэрлэх байгууламжид шилжүүлэн найдвартай ажиллагааг ханган ажиллаж байна.    

Өдөрт 20000м3 ус цэвэрлэх хүчин чадалтай энэхүү байгууламж нь шат дамжлагийн хувьд 11 төрлийн нийт 14 барилгаас бүрдэх бөгөөд энэ нь 7 давхар шүүлтүүртэй. Шүүгдэж гарсан усыг техникийн хэрэгцээнд ашиглах, мөн лагийг дулааны аргаар боловсруулж био хий гаргаж авах ба түүнийгээ цэвэрлэх байгууламжийн дотоодын дулааны хэрэгцээг хангах, боловсруулж усгүйжүүлсэн лагийг хөрс бордох, газар тариаланд хэрэглэх боломжтой. Лагийг бүрэн боловсруулсан тул түүнийг ашиглахад эрүүл ахуйн хувьд аюулгүй байх юм.

Бүрэн автомат ажиллагаатай ба бохир усыг химийн арга, хэт ягаан туяа ашиглан халдваргүйжүүлэн 98 хувь цэвэрлэнэ. Дэлхийд инженерийн байгууламжаараа өндөрт тооцогддог технологиор баригдсан.

Уг цэвэрлэх байгууламж ашиглалтад орсноор Улаанбаатар хотын ундны усны эх үүсвэр Туул голын усны чанарыг хамгаалах,  бохир усыг зохих түвшинд хүртэл цэвэрлэснээр усны бохирдол багасч оршин суугчдын эрүүл мэндийн байдал сайжрах гээд олон талын ач холбогдолтой юм.

Мөн нийслэлийн баруун өмнөд хэсэгт хот төлөвлөлт, барилгажилт, бүтээн байгуулалтын ажил өргөжин шинэ суурьшлын бүс нэмэгдэх, хот тэлэх бололцоо нэгээр нэмэгдэж байна.

 Ингээд БХБ-ын сайд Х.Баделханы хэлсэн үгийг бүрэн эхээр нь хүргэж байна. 

Та бүхэнд энэ өдрийн мэнд хүргэе. Монгол Улсын Засгийн газрын 2016-2020 оны үйл ажиллагааны хөтөлбөрт тусгагдсан ажил болох “Улаанбаатар хотод хоногт 20,000 метр куб бохир ус цэвэрлэх хүчин чадалтай цэвэрлэх байгууламжийг шинээр барьж ашиглалтад оруулах” ажлыг Бүгд Найрамдах Турк Улсын “Эйч Эн Си” ХХК гүйцэтгэж, төсөл арга хэмжээ ашиглалтад орж байна.

Шинэ Засгийн газар байгуулагдан 1 жилийн хугацаанд нийгэм эдийн засагт үр нөлөөтэй бүтээн байгуулалтын ажлуудыг хийж гүйцэтгэн дууссаны нэг бүтээн байгуулалт бол уг цэвэрлэх байгууламж юм.

Улаанбаатар хотын Баруун Өмнөд хэсэг буюу Яармаг, Нисэхийн орон сууцны хуучин, шинэ хорооллын 160 мянган айл өрх, аж ахуйн нэгж объектуудын бохир усыг цэвэрлэн татан зайлуулах хүчин чадалтай барилга байгууламж бий болж байна.

Манай улс анх удаагаа лагийг дахин боловсруулж метан хий гарган үйлдвэрлэлийн дулаанд ашиглах шинэ дэвшилтэт технологи бүхий битүү байгууламжтай цэвэрлэх байгууламж бий болсноор байгаль орчинд ээлтэй шинэ дэвшилтэт технологи нэвтэрч байна.

Өдөрт 20000м3 ус цэвэрлэх хүчин чадалтай энэхүү байгууламж нь шат дамжлагийн хувьд 11 төрлийн нийт 14 барилгаас бүрдэх бөгөөд энэ нь 7 давхар шүүлтүүртэй. Шүүгдэж гарсан усыг техникийн хэрэгцээнд ашиглах, мөн лагийг дулааны аргаар боловсруулж био хий гаргаж авах ба түүнийгээ цэвэрлэх байгууламжийн дотоодын дулааны хэрэгцээг хангах, боловсруулж усгүйжүүлсэн лагийг хөрс бордох, газар тариаланд хэрэглэх боломжтой. Лагийг бүрэн боловсруулсан тул түүнийг ашиглахад эрүүл ахуйн хувьд аюулгүй байх юм.

Уг цэвэрлэх байгууламж ашиглалтад орсноор нийслэлийн баруун өмнөд хэсэгт хот төлөвлөлт, барилгажилт, бүтээн байгуулалтын ажил өргөжин шинэ суурьшлын бүс нэмэгдэн хот тэлэх бололцоо нэгээр нэмэгдэж байна.

Тус нээлтэд ирсэн хүндэт зочид та бүхэнд талархаж, цаашдын ажилд амжилт хүсье.

 УИХ-ЫН ГИШҮҮН, ЗГ-ЫН ГИШҮҮН,

БАРИЛГА, ХОТ БАЙГУУЛАЛТЫН САЙД                        Х.БАДЕЛХАН

 




Манай сайт таалагдаж байвал л LIKE дараарай


Сэтгэгдэлүүд


Анхааруулга! Уншигчдын бичсэн сэтгэгдэлд gereg.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл нэмэх