У.Хүрэлсүх УИХ-ыг тараах эрхтэй байна гэдэг нь....

2018-10-04 09:09      ГэрэгМН

Засгийн газрын танхимд ганцаараа УИХ-ын гишүүн бус нэг нөхөр байгаа нь Ерөнхий сайд У.Хүрэлсүх. 32 ба 33-аараа хуваагдсан намынх нь гишүүд нэг дургүйгээ хүрвэл засгийг нь нэг л өдөр унагаад хаячихаж мэдэх тул У.Хүрэлсүх өөрөөсөө бусад сайдуудаа танхимаас бүрдүүлэх санал гаргаж,тэр нь хувь амбицтай гишүүдэд таалагдсанаар одоогоос яг жилийн өмнө танхим бүрдсэн билээ.

Ингэхдээ Ерөнхий сайдтай нийлээд Засгийн газрын 16 гишүүнийг танай ба манай тал (МАН-ын хуучин дарга.Энхболдын талаас ба шинэ дарга У.Хүрэлсүхийн тал)-аас тэнцүү хуваан авах зарчмаар танхим бүрдсэн.

У.Хүрэлсүхийн хувьд “танай талын” сайдууд нэг хэсэгтээ л Ерөнхий сайдынхаа үгэнд орохгүй пээдийсэн гэдэг.Гэвч засаг нь бүтэлгүйтвэл өөрөө ч бас бүтэлгүйтэх учраас хүссэн ч,эс хүссэн ч нэг, хоёр М.Энхболдын  фанатаас бусад нь Ерөнхий сайдаа дагаж эхэлжээ. Тэднийг “танай талынхан” манайхаас урвасан гэлцдэг аж. Тиймдээ ч АТГ-аар “оролдуулах” гэх мэтээр хариугаа авахыг оролддог гэх.

Энэ мэтчилэн Засгийн газар танхимын зарчмаар ажиллаж чадахгүй, бүтэн жил өнгөрсөн атал  Ерөнхий сайд өдгөө ч “танай тал”-ын сайдтай ажиллах гэж зовж яваа.

Хэрвээ парламентын засаглалтай ч Ерөнхий сайддаа эрх мэдэл өгдөг зарим улс орнууд шиг У.Хүрэлсүх өөрийн толгойгоор танхимын сайдуудаа томилсон бол  магадгүй энэ Засгийн газар маш олон асуудлыг шийдэж, У.Хүрэлсүх байнга хэлдэг шударга ёсоо тогтоож эхэлсэн байх биз ээ.

Гэтэл “Москва ханиад хүрэхэд Улаанбаатар найтаана” гэгчээр нэг яамны газрын даргыг солих гэсний төлөө УИХ-ын гишүүн Ж.Мөнхбат чуулган дээр дайраад байхаар хэрхэн шударга ёс тогтоох билээ,хэнтэй хэрхэн яаж хариуцлага тооцох билээ? Ерөнхий сайд нэг удаа “26 газрын дарга томилуулчихаад ханаагүй УИХ-ын гишүүн байна” гэж хэлсэн удаатай.

Хэрвээ Үндсэн хуулиар одоогийн  парламентын засаглалаа боловсронгуй болгосон өөрчлөлт хийвэл, өөрөөр хэлбэл сонгодог парламентын засаглалд шилжвэл У.Хүрэлсүх өөрөөсөө бусад сайдуудаа  өөрөө томилох бөгөөд өөрөө  л зөвхөн УИХ-аас  томилогддог болох юм. Сайдуудаа өөрөө мэдэж томилно гэдэг эргээд тэдэнтэйгээ хариуцлага тооцох боломжтой болно гэсэн үг. Өнөөдөр гэтэл МАН-ын дарга,Ерөнхий сайдаас ч “том” даргын хүн сайд болчихоод “У.Хүрэлсүх чи юу юм бэ” гээд пээдийгээд зогсож байгаа нь гажуудал юм.

Хэрвээ сонгодог парламентын тогтолцоонд шилжиж чадвал өөр нэг асуудал тов тодорхой болох нь төсвийн хуваарилалт ба зарцуулалт.

Төсөв хэлэлцэх энэ өдрүүдэд УИХ-ын гишүүд өөрийн тойргийн ба тойргийн бус хувийн эрх ашгийн мөнгөнүүдээ суулгах гээд ил,далд түмэн лобби,шантааж хийнэ.УИХ-ын гишүүдийн төсвийн хуваарилалт, зарцуулалтад оролцох эрхийг бараг л Сангийн сайдтай ижилдүү гэхэд хэтрүүлсэн болохгүй.

Ер нь бол төсвийн хэлэлцүүлгийн үеэр Монгол Улс нэг Ерөнхий сайдаасаа гадна 76 Ерөнхий сайдтай юм шиг л болно. Төсвийн төслөө эрх биш боловсруулж, өргөн барьсан юм болохоор Сангийн сайд багцлах гэж оролдоно. Тэгэнгүүт тал талаас дайрч давшилсаар Засгийн газрын хуралдаанаар хэлэлцэн баталж өргөн барьсан төсөл сэмэрхий дээл шиг юм болж хоцрох вий.

Өчигдөр гэхэд л байнгын хорооны хурал дээр УИХ-ын гишүүн Ж.Мөнхбат “мөрөөдлийн жагсаалт” хэмээн давшилж суусан.Эрхэм гишүүдийн шантааж,шахаа эхэлж байгаа нь тэр.Сонгуулийн өмнөх жилийн улсын төсвөө батлуулах гэж Сангийн сайд их ч зовно доо хөөрхий.   

 Хэрвээ Ерөнхий сайдад эрх мэдэл өгсөн парламентын тогтолцоонд шилжвэл талаар нэг тарааж хаядаг улсын төсвийн хуваарилалт ба зарцуулалтыг Засгийн газар мэдэж хийнэ ээ гэсэн үг. Өнөөдөр бол жижиг мажоритароор сонгогдсон УИХ-ын гишүүдийн шахаасаар төсөв батлагдах маягтай, улмаар улсын нэгдсэн төсөв гэх утга алдагдсаар ирсэн.Ийм байхад төсвөөр дамжин явагдах улсын хөгжлийн бодлого ч хэрэгжихгүй.

Ерөнхий сайд У.Хүрэлсүхэд боловсон хүчний томилгоог төсвийн эрх мэдэлтэй нь өгч байж ялсан нам бодлогоо хэрэгжүүлж,бас улсаа хөгжүүлээд,шударга ёсыг ч тогтоох боломжтой гэсэн үг. 

Дээр нь нэмээд УИХ-ыг тараах эрх  бас У.Хүрэлсүхэд байх ёстой гэдэг нь мөнөөх сонгодог парламентын тогтолцоогоо бүр төгөлдөржүүлж байгаа хэрэг. УИХ улстөржөөд,эсвэл “танай,манай”-гаараа хуваагдаад  Засгийн газраас оруулж өгсөн бодлогыг нь баталж өгөхгүй бол У.Хүрэлсүхийн саналаар парламентыг тарж болно.

Өөрөөр хэлбэл,ажлаа хийхгүй улстөржөөд байгаа УИХ-ыг тараая гэж гудамжинд,эсвэл сошиалд орилох үр дүнгүй,эзэн биегүй  үйлдлийг эзэнтэй болгоё гэж байгаа юм. Тэр эзэн нь Ерөнхий сайд. Одоогийн Үндсэн хуулиар УИХ-ын олонхиор УИХ тарах тухай зааж өгсөн байдаг. Хэдий муу ч УИХ-ын гишүүд өөрөө  өөрийнхөө эсрэг УИХ-аа тараах уу? Хэзээ ч үгүй.

 Т.Үлэмж




Манай сайт таалагдаж байвал л LIKE дараарай


Сэтгэгдэлүүд


Анхааруулга! Уншигчдын бичсэн сэтгэгдэлд gereg.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
erh tutaagui ee

Tanhimiinhaa saiduudiig Hurelsuh ooroo burduulj sain ahdaa taniltsuluulj Hurelbaataraas busdiig zovshoorsnii taraa l Ih hural batlaa bizdee. Tegeed ch Hurelsuhiin farktsiin said nar tolgoi daraalan JDUD sangaas zeelavsan baigaa bizdee. Uunii ard Hurelsuh ediin zasgaa zuzaalah sanaa nuugdaj baisan bizdee

2018-11-12 22:45    43.231.115.251
ovilogogui erhemd ild buu bariul

Hun omgoolj boloh ch ooriinhoo biee sain beldej onoliin tuvshin bichih medleg heregtei bolohoos bish Hurelsuhed erh medliig tovloruulhiig surtaldaj olon ulsiin praktikaas hol zorootoi yum bichih solioroh hereggui ee. Anh ardchilal garch irehdee erh medel neg hund tovlosnii gaig duudaj garch iree bisdee.Ter ued niigemd muu yum baga chigch.humuus ni tolov tovshin zarchimch taldaa tuldaa gaigui baisa. Odoo negd hund erh medliig tovolruulbel ter dundaa Hurelsuh shig oroo busgaa ovilogogui deer ni bolovsrol nimgend hund erh medliig tovloruulvel estoi l galzuu hund mes bariulsantai adil yum.n

2018-11-12 22:32    43.231.115.251

Сэтгэгдэл нэмэх