Туркт Оросын элчинг хөнөөсөн аллагыг зохион байгуулсан этгээдийг баривчилжээ

2018-01-11 16:29      ГэрэгМН

Турк улсад өнгөрсөн 2016 онд ОХУ-ын Элчин сайд Андрей Карловыг хөнөөсөн аллагыг зохион байгуулсан этгээдийг баривчилсан тухай ТАСС мэдээллээ.

“Daily Sabah”-т мэдээлснээр, гэмт этгээд өмнө нь ял эдэлж байжээ. Түүнийг "Fethullahists" хэмээх террорист бүлэглэлтэй холбоотой хэргээр баривчилж байжээ.

Мөрдөн байцаагчид түүнийг Оросын элчингийн амь насанд халдсан хэрэгт гол үүрэг гүйцэтгэсэн буруутан гэдэгт итгэлтэй байгаагаа илэрхийлжээ.

2016 оны арванхоёрдугаар сарын 19-ний өдөр Андрей Карловыг Анкара дахь Оросын элчингээс зохион байгуулсан "Орос орон туркийн нүдээр" зургийн үзэсгэлэнгийн нээлтийн үеэр хөнөөсөн юм.

Түүнийг гардан хөнөөсөн Мевлют Мерт Алтынташ гэгч нь цагдаагийн ажилтан байсан бөгөөд хохирогчийн нуруун тус газар буудсан. Карлов газар дээрээ нас барж, алуурчин цагдаагийнхны бууны суманд оногдон амиа алдсан.

ОХУ-ын Гадаад харилцааны яам энэхүү аллагыг террорист ажиллагаа хэмээн нэрлэж байлаа. Тус улсын Мөрдөн байцаах хорооноос Олон улсын терроризмын тухай хуулийн дагуу эрүүгийн хэрэг үүсгэсэн. Элчин сайд агсан Карловт “Оросын баатар” цол хүртээсэн юм.

Өнгөрсөн 2017 оны арванхоёрдугаар сард Туркийн прокурорын албанаас ОХУ-ын дипломатчийн амь насыг хөнөөсөн этгээд нь эдүгээ АНУ-д амьдарч буй тэрс үзэлтэн, исламын номлогч Феттул Гулентэй холбоотой гэж мэдэгдсэн билээ.

Анкара Гуленыг мөн 2016 оны долдугаар сарын 15-ны өдөр төрийн эргэлт хийхийг оролдсон хэрэгт буруутгадаг.




Манай сайт таалагдаж байвал л LIKE дараарай


Сэтгэгдэлүүд


Анхааруулга! Уншигчдын бичсэн сэтгэгдэлд gereg.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл нэмэх

 

Шинэ мэдээ

Цаг үе

Үүл буудаж, цас оруулжээ

2018-04-19 15:08